Япония полициячилари 2020 йил март ойида ноқонуний экспортда айбланиб, ҳибсга олинган ва кейинчалик тергов вақтида вафот этган тадбиркор Шизуо Аишиманинг қабрига гуллар қўйиб, кечирим сўради. Бу ҳақда BBC хабар берди.
Ушбу “кечирим сўраш” маросими 25 август куни бўлиб ўтган. Марҳумнинг оила аъзолари расмийлардан узрни “қабул қилиб олган”. Аммо Аишиманинг рафиқаси уларни кечира олмаслигини таъкидлаган.
Маълум бўлишича, Аишима ва унинг 3 нафар ҳамкасби саноат ускуналарини, хусусан ҳарбий мақсадларда ҳам қўлланиладиган қуритгич қурилмаларини (суюқликни кукунга айлантирадиган машиналар) ноқонуний экспорт қилганликда айбланган. Бунга жавобан, марҳумнинг компанияси экспорт чекловларини бузмаганини даъво қилган.
Япон прокуратураси 2021 йил июль ойида айбловларни бекор қилишидан 5 ой аввал Аишима ошқозон саратони касаллигидан вафот этган. Бу пайтда эркак тергов жараёнида бўлган. Расмийлар унинг гаров эвазига озодликка чиқиш ҳақидаги 8 та сўровини рад этган.
Суд 2021 йил сентябрь ойида айбловларни ноқонуний деб топиб, давлатни 166 миллион ен (тахминан 1,12 млн доллар) товон пули тўлашга мажбур қилган. Ҳукм устидан ҳеч қандай шикоят киритилмаган ва у 2024 йил июнь ойида кучга кирган. Ҳуқуқ-тартибот органларининг айбларини тан олган прокурор Хироси Ичикава вазиятга шундай муносабат билдирган:
“Ноқонуний ҳибс, айблов ва гаровни рад этиш орқали Аишиманинг инсон ҳуқуқларини поймол қилдик”.
Изоҳ (0)