Россия Украина билан тинчликка эришиш йўлида вақт чўзиш стратегиясидан фойдаланмоқда. Яъни Россия Владимир Путин ва Владимир Зеленский учрашувини қандайдир дастлабки шартларга боғламоқда. Бу ҳақда Германия канцлери Фридрих Мерц Канада бош вазири Марк Карни билан ўтказган қўшма матбуот анжуманида айтиб ўтган.
Канцлернинг сўзларига кўра, Путиннинг дастлабки шартларини Европа ва Украина мутлақо қабул қилмайди.
“Путин бу учрашувни дастлабки шартларга боғлашни тўғри деб ҳисоблаяпти. Бироқ Украина, бизнинг ва шахсан менинг нуқтаи назаримдан, бундай шартлар мутлақо қабул қилиб бўлмайдиган нарсалардир”, деган Германия ҳукумати раҳбари.
Немис ҳукумати раҳбари Москва навбатдаги қадамни ташлаши керак деган фикрда. Агар бу содир бўлмаса, Европа Иттифоқи давлатлари Россияга нисбатан янги санкцияларни жорий қилади.
“Россия бу қадамни ташламаса, янада кучлироқ босим ўтказиш керак бўлади. Агар Трамп ва Путин келишган учрашув бўлмаса, ташаббус яна бизнинг қўлимизга ўтади. Мен европаликлар ва америкаликларни назарда тутаяпман”, деган Мерц.
Унинг қайд этишича, тинчлик йўлидаги кейинги мантиқий қадам — Зеленский, Путин ва Трамп иштирокидаги уч томонлама музокара бўлиши керак.
Худди шундай фикрни Канада бош вазири Марк Карни ҳам билдирди. Унинг баҳолашича, Путин Зеленский билан шахсан учрашишдан қўрқмоқда ва шунинг учун уни чўзмоқда. “Канада Украинада тинчлик ва хавфсизликни таъминлашга ўз ҳиссасини қўшади”, деган Канада ҳукумати раҳбари.
Карни бундай мақсадларга фақат куч орқали эришиш мумкинлигини таъкидлади: Россияга қарши санкциялар, Украина армиясини кучайтириш ва ишончли хавфсизлик кафолатлари муҳим аҳамиятга эга.
Америка Қўшма Штатлари президенти Дональд Трамп 18 август куни Оқ уйда Владимир Зеленский ва бошқа Европа давлатлари раҳбарларини қабул қилди. Трамп учрашув якунидаги матбуот анжуманида Владимир Зеленский ва Владимир Путин ўртасида музокара ўтказилишини эълон қилди.
Трамп ва Европа етакчиларининг учрашувида Украинага берилиши мумкин бўлган хавфсизлик кафолатлари ҳам муҳокама қилинган. Россия ташқи ишлар вазири Сергей Лавров эса Россиянинг иштирокисиз бериладиган кафолатлар қабул қилинмаслигини айтди. Шунингдек, у хавфсизлик кафолатларини ишлаб чиқишда Хитой ва Ҳиндистон каби давлатлар ҳам иштирок этиши кераклигини таъкидлади. Таҳлилчиларга кўра, Россиянинг биринчи рақамли дипломати бундай баёнотлари билан Путин ва Зеленскийнинг учрашувини минимал даражага туширди.
Изоҳ (0)