Rossiya Ukraina bilan tinchlikka erishish yo‘lida vaqt cho‘zish strategiyasidan foydalanmoqda. Ya’ni Rossiya Vladimir Putin va Vladimir Zelenskiy uchrashuvini qandaydir dastlabki shartlarga bog‘lamoqda. Bu haqda Germaniya kansleri Fridrix Merts Kanada bosh vaziri Mark Karni bilan o‘tkazgan qo‘shma matbuot anjumanida aytib o‘tgan.
Kanslerning so‘zlariga ko‘ra, Putinning dastlabki shartlarini Yevropa va Ukraina mutlaqo qabul qilmaydi.
“Putin bu uchrashuvni dastlabki shartlarga bog‘lashni to‘g‘ri deb hisoblayapti. Biroq Ukraina, bizning va shaxsan mening nuqtai nazarimdan, bunday shartlar mutlaqo qabul qilib bo‘lmaydigan narsalardir”, degan Germaniya hukumati rahbari.
Nemis hukumati rahbari Moskva navbatdagi qadamni tashlashi kerak degan fikrda. Agar bu sodir bo‘lmasa, Yevropa Ittifoqi davlatlari Rossiyaga nisbatan yangi sanksiyalarni joriy qiladi.
“Rossiya bu qadamni tashlamasa, yanada kuchliroq bosim o‘tkazish kerak bo‘ladi. Agar Tramp va Putin kelishgan uchrashuv bo‘lmasa, tashabbus yana bizning qo‘limizga o‘tadi. Men yevropaliklar va amerikaliklarni nazarda tutayapman”, degan Merts.
Uning qayd etishicha, tinchlik yo‘lidagi keyingi mantiqiy qadam — Zelenskiy, Putin va Tramp ishtirokidagi uch tomonlama muzokara bo‘lishi kerak.
Xuddi shunday fikrni Kanada bosh vaziri Mark Karni ham bildirdi. Uning baholashicha, Putin Zelenskiy bilan shaxsan uchrashishdan qo‘rqmoqda va shuning uchun uni cho‘zmoqda. “Kanada Ukrainada tinchlik va xavfsizlikni ta’minlashga o‘z hissasini qo‘shadi”, degan Kanada hukumati rahbari.
Karni bunday maqsadlarga faqat kuch orqali erishish mumkinligini ta’kidladi: Rossiyaga qarshi sanksiyalar, Ukraina armiyasini kuchaytirish va ishonchli xavfsizlik kafolatlari muhim ahamiyatga ega.
Amerika Qo‘shma Shtatlari prezidenti Donald Tramp 18-avgust kuni Oq uyda Vladimir Zelenskiy va boshqa Yevropa davlatlari rahbarlarini qabul qildi. Tramp uchrashuv yakunidagi matbuot anjumanida Vladimir Zelenskiy va Vladimir Putin o‘rtasida muzokara o‘tkazilishini e’lon qildi.
Tramp va Yevropa yetakchilarining uchrashuvida Ukrainaga berilishi mumkin bo‘lgan xavfsizlik kafolatlari ham muhokama qilingan. Rossiya tashqi ishlar vaziri Sergey Lavrov esa Rossiyaning ishtirokisiz beriladigan kafolatlar qabul qilinmasligini aytdi. Shuningdek, u xavfsizlik kafolatlarini ishlab chiqishda Xitoy va Hindiston kabi davlatlar ham ishtirok etishi kerakligini ta’kidladi. Tahlilchilarga ko‘ra, Rossiyaning birinchi raqamli diplomati bunday bayonotlari bilan Putin va Zelenskiyning uchrashuvini minimal darajaga tushirdi.
Izoh (0)