Venesuela prezidenti AQSH tahdidlariga javoban 4,5 mln militsiyani safarbar qiladi

Venesuela prezidenti Nikolas Maduro 19-avgust kuni AQSHning navbatdagi bosimlariga javoban 4,5 milliondan ortiq militsiya xodimi safarbar qilinishini ma’lum qildi. Bu harakat Vashingtonning Maduro boshi uchun mukofot pulini oshirgani ortidan qabul qilinmoqda. Bu haqda Al Jazeera xabar berdi.

Maduroning aytishicha, maxsus reja asosida butun mamlakat bo‘ylab harbiy kuchlar joylashtirib chiqiladi.

“Men bu hafta butun mamlakat bo‘ylab 4,5 milliondan ortiq militsiyani safarbar qilaman. Ular har qanday sharoitga tayyor va qurollangan bo‘ladi”, dedi prezident o‘zining telemurojaatida.

Venesuela politsiyasi mamalakat sobiq prezidenti Ugo Chaves davrida tuzilgan bo‘lib, rasmiy ma’lumotlarga ko‘ra, u 5 millionga yaqin harbiydan iborat. Biroq tahlilchilar bu raqam ancha ko‘pirtirilganini aytadi. AQSH prezidenti Donald Tramp ma’muriyati so‘nngi kunlarda Maduroni hibsga olish uchun mukofot miqdorini 50 million dollargacha oshirib, prezidentni giyohvand moddalar kontrabandasida ayblagan edi. Shundan keyin, Vashington Karib dengiziga 3 ta harbiy esminets — USS Gravely, USS Jason Dunham va USS Sampson’ni jo‘natgan. Operatsiyada qariyb 4 ming dengizchi va dengiz piyodasi qatnashmoqda.

Maduro AQSH ayblovlarini “bema’ni va asossiz” deb rad etmoqda. Shu bilan birga u ishchi hamda dehqonlardan iborat militsiya sonini ko‘paytirib, ularni qurol bilan ta’minlashini va’da qilmoqda. Venesuela rahbari xalqaro hamjamiyatda AQSH bosimiga qarshi fikr bildirgan davlatlarga minnatdorlik bildirgan. Jumladan, Meksika prezidenti Klaudiya Sheynbaum Maduroning Meksikadagi Sinaloa karteli bilan aloqadorligi haqidagi Vashington iddaolarini rad etgan.