Афғонистон ва Ўзбекистон электр энергиясини узатиш ва подстанциялар қуриш бўйича 243 миллион долларлик тўртта шартнома имзолади. Бу ҳақда Афғонистоннинг DABS энергетика компанияси хабар берди.
Тегишли шартномалар DABS ва Ўзбекистон Энергетика вазирлиги ўртасида имзоланган. Улар қуйидаги лойиҳаларни ўз ичига олади:
- 500 киловолтли Сурхон-Дашт-Алвон электр узатиш линиясини 1000 мегаватт қувват билан кенгайтириш.
- Арғандаҳ подстанциясини 800 мегаволт-ампер (МВА) қувват билан кенгайтириш.
- Нангарҳор вилоятида Шайх Месри подстанциясини қуриш.
- 220 киловолтли Кобул-Нангарҳор (Шайх Месри) электр узатиш линиясини кенгайтириш.
Ушбу йирик лойиҳаларни имзолаш маросимида Афғонистон томонидан бош вазирининг иқтисодий масалалар бўйича ўринбосари Мулла Абдул Ғани Бародар, Давлат корпорациялари бош бошқармаси раҳбари Мавлавий Аҳмад Жан Билол иштирок этган.
Ўзбекистон томонидан эса энергетика вазири Жўрабек Мирзамаҳмудов ва Афғонистон бўйича махсус вакил Исматилла Эргашев қатнашган. Маросим давомида DABS компанияси директори Абдул Бари Умар келиш Афғонистон электр таъминотини таъминлашда муҳим эканини таъкидлаган.
Ушбу лойиҳалар савдо, саноат ва қишлоқ хўжалиги соҳаларини ривожлантиришга ёрдам беради, натижада мамлакатнинг сезиларли тараққиётига йўл очади, деган у.
Ўзбекистон энергетика вазири ҳам ўз нутқида ушбу йирик лойиҳалар икки давлатнинг мустаҳкам ҳамкорлиги ва доимий саъй-ҳаракатлари натижаси эканини билдирган.
Мирзамаҳмудов икки томон янги имзоланган лойиҳаларни амалга оширишда биргаликда ишлашини айтган.
Худди шу маросимда DABS ва Ўзбекистон компаниялари ўртасида ўн йил муддатга электр энергиясини сотиб олиш бўйича шартнома имзоланган.
Изоҳ (0)