2025 йил 16–17 август кунлари Қирғизистоннинг бош шаҳри Бишкекда “Заковат” интеллектуал ўйини бўйича III Осиё очиқ чемпионати ўтказилади. Ушбу йирик тадбирда Осиёнинг энг кучли жамоалари бир-бирлари билан беллашади ва минтақадаги энг яхши жамоа унвони учун куч синашади.
“Заковат” 24 йилдан буён дунё бўйлаб иштирокчиларга билим олиш ва ривожланишга илҳом бериб келмоқда. Дастлаб телекўрсатув сифатида намойиш этилган ушбу ўйин бугунги кунда жаҳоннинг турли мамлакатларида ўтказиладиган йирик интеллектуал ҳаракатга айланган. Ҳар йили минглаб иштирокчилар, шу жумладан, бир нечта халқаро жамоалар бу ўйинда иштирок этиб, ўз билимларини синаб кўришади.
Ўтган йилларда “Заковат” турнирлари АҚШ, Буюк Британия, Малайзия, Қозоғистон ва Тожикистонда ўтказилган. Шунингдек, Тошкентнинг ўзида сўнгги йилларда умумтаълим мактаблари, ўрта махсус ва профессионал таълим муассасалари, олий ўқув юртлари ҳамда ҳаваскор жамоалар ўртасида 29 мингдан ортиқ ўйин бўлиб ўтган. Шу билан бирга 2023 йилда “нон шаҳри”да 14 мамлакатдан 55 та жамоа иштирок этган I Осиё очиқ чемпионати ҳам муваффақиятли ўтказилди. Қозоғистонда бўлиб ўтган иккинчи турнир ҳам ўзининг юксак савияси ҳамда 14 давлатдан келган билимдонлар билан ажралиб турди.
Бишкекда ўтказилаётган “Заковат”нинг навбатдаги III Осиё очиқ чемпионати нафақат илм-фан ва таълим соҳасидаги интеллектуал воқеа, балки мамлакатлар ўртасидаги дўстлик ва ҳамкорликни янада мустаҳкамлаш учун ажойиб имконият яратади.
Чемпионатда қатнашувчи жамоалар жами 6 турда 72 та саволга жавоб топиш орқали ўз билим ва салоҳиятларини намоён қилишади. Тадбир, ўз навбатида, нафақат билимни синовдан ўтказиш, балки янги авлодни билим олишга, ўзини ривожлантиришга интилишга ундашга қаратилганлиги билан ҳам муҳим аҳамият касб этмоқда.
Изоҳ (0)