SpaceX kompaniyasining Starlink sun’iy yo‘ldosh internet xizmati 2,5 soat davom etgan uzilish sabab butun dunyo bo‘ylab o‘z foydalanuvchilariga xizmat ko‘rsata olmadi. Kompaniya buni ichki dasturiy xizmatdagi nosozlik bilan izohladi.
Starlink dunyo bo‘ylab 140 dan ortiq mamlakatda istiqomat qiluvchi 6 milliondan ziyod foydalanuvchiga xizmat ko‘rsatadigan internet tarmog‘idir. U payshanbadan jumaga o‘tar kechasi kuni global uzilishlarga duch keldi. Natijada millionlab insonlar taxminan ikki yarim soat davomida uning xizmatlaridan foydalana olmadi. Bu ayniqsa, Ukraina armiyasi jangovar imkoniyatlariga salbiy ta’sir qildi.
Downdetector ma’lumotiga ko‘ra, uzilish AQSH sharqiy qirg‘oqlarida mahalliy vaqt bilan soat 15:00 atrofida boshlangan. Starlink’ning veb saytiga nosozlik yuzasidan 61 mingdan ziyod shikoyat kelib tushgan.
Starlink muhandislik bo‘yicha vitse-prezidenti Maykl Nikollsning aytishicha, muammo “tarmoqning asosiy qismini boshqaradigan ichki dasturiy xizmatdagi nosozlik” sabab yuzaga kelgan.
“Vaqtinchalik uzilish uchun uzr so‘raymiz. Biz yuqori darajada ishonchli tarmoqni ta’minlashga qat’iy bel bog‘laganmiz va bu muammoni ildizi bilan bartaraf etamiz”, dedi u.
SpaceX asoschisi Ilon Mask ham foydalanivchilardan uzr so‘radi.
“Uzilish uchun uzr. SpaceX muammoning ildizini bartaraf etadi va bu qayta takrorlanmasligini ta’minlaydi”, degan tadbirkor.
Starlink 2020-yildan buyon Yer orbitasiga 8 000 dan ziyod sun’iy yo‘ldoshni olib chiqqan. Tizimga nisbatan talab tobora oshib bormoqda. Tarmoq, ayniqsa, an’anaviy internet xizmatlari yetib borishi murakkab bo‘lgan hududlarda tez ommalashyapti.
Izoh (0)