Россия президенти Владимир Путин ва Беларусь раҳбари Александр Лукашенко Валаамдаги музокаралар олдидан Украинадаги можаро, уни тартибга солиш истиқболлари ва сўнгги қуроллар ҳақида баёнот берди.
Журналистлар билан учрашувда Владимир Путин Истанбулда бўлиб ўтган учрашувларга умуман ижобий баҳо бериб, Украина бўйича музокаралар ҳар доим долзарб ва муҳим эканини гапириб ўтган.
“Мен Истанбулдаги музокараларни умуман олганда ижобий баҳолайман. Юзлаб одамларнинг ватанга қайтгани — қандай қилиб бу ижобий ҳолат бўлмасин? Биз инсонпарварлик нуқтаи назаридан минглаб ҳалок бўлган украин аскарларининг жасадларини топширдик. Бунинг эвазига ватан учун жон берган ўнлаб аскарларимизнинг жасадларини олдик”, деган у.
Шу билан бирга, Россия раҳбари АҚШ президенти Дональд Трамп томонидан қўйилган ультиматумга ишора қилиб, Украина бўйича музокаралар омма олдида эмас, балки сокин муҳитда жиддий музокаралар ўтказиш кераклигини билдирган.
“Кимдандир бўлган қандайдир ҳафсалалар пир бўлиши ортиқча кутишлардан келиб чиқади. Масалани тинч йўл билан ҳал қилиш учун асосли, чуқур суҳбатлар зарур. Бу суҳбатлар омма олдида эмас, балки музокаралар осойишта муҳитида олиб борилиши керак. Шунинг учун биз учта ишчи гуруҳ тузишни таклиф қилдик. Умуман олганда, Украина томони бунга ижобий муносабат билдирди”, деган Путин.
Путиннинг айтишича, узоқ муддатли сулҳ учун Россиянинг шартлари ўзгаришсиз қолмоқда.
“Биз шартларимизни ўтган йил июнь ойида Ташқи ишлар вазирлиги раҳбарияти билан учрашувда баён қилганмиз. Бу рус тилининг мақоми, мустақиллик ва Украинадаги православ черкови, христиан черкови учун муносиб ривожланиш шароитлари. Мана шу барча масалалар биргаликда муҳокама қилиниши ва ҳеч қандай вақт чегараларисиз узоқ муддатли тинчлик асосига қўйилиши керак”.
АҚШ президенти Дональд Трампнинг ультиматумига Беларусь раҳбари Александр Лукашенко изоҳ берди. У Трампнинг Россияга қўйган ультиматумини кулгили деб атаган.
“50, 60 ёки 10 кун. Сиёсат бундай юритилмайди. Агар у тинчликни истаса, эҳтиёткорлик билан, пухта ёндашуви керак. Бу ҳарбий тўқнашув, бу ерда буйруқ бериб бўлмайди, айниқса ядровий давлатга. Кечирасиз, бу кулгили”, деб жавоб берган Беларусь раҳбари.
Шунингдек, Россия президенти “Орешник” ракеталарини тизимли равишда ишлаб чиқиш йўлга қўйилганини қўшимча қилган.
“Биз биринчи серияли “Орешник” тизимини ишлаб чиқардик. У армияга топширилди. Энди сериал ишлай бошлади. Мутахассисларимиз келажакдаги позициялар учун жой танладилар ва ҳозирда ушбу позицияларни тайёрлашмоқда. Демак, биз катта эҳтимол билан йил охиригача бу масалани ёпамиз”, деди Владимир Путин.
Изоҳ (0)