44 ёшли хонанда ва актёр Жастин Тимберлейк “Forget Tomorrow” номли дунё бўйлаб гастрол сафарини 30 июль куни Туркиянинг Истанбул шаҳрида берган концерт билан якунлагач, Лайм касаллигига чалинганини эълон қилди.
Лайм касаллиги бактериал инфекция бўлиб, одатда тропик каналар чақиши орқали юқади. Бу касалликни асосан Боррелиа бургдорфери деб номланган бактерия келтириб чиқаради. Хасталик мушак оғриғи, бош оғриғи, хотира ва онг фаолиятида бузилишлар, бўғимлар шишиши, чарчоқ ва бошқа нохуш симптомлар билан кечади.
Касаллик илк бор 1970 йилларда АҚШнинг Лайм шаҳарчасида аниқланган ва шу сабабли унинг номи шундай қўйилган. Бактерия одатда ўрмонли, бутазорларга бой ҳудудларда, айниқса баҳор ва ёз ойларида кўпроқ тарқалади.
“Сўнгги концерт дастурим энг қувончли, ҳиссиётларга бой, аммо жисмонан қийин ва чарчатадиган тажриба бўлди. Мен оилам, дўстларим ва сизларнинг ёрдамингизсиз буни енгиб ўтолмас эдим. Чунки сўнгги ойларда соғлиғим ёмонлашди ва мен Лайм касаллигига чалинганимни билдим. Буни сизларнинг ҳамдард бўлишингиз учун эмас, балки бошимдан кечирганимни очиқ сўзлаб бериш учун айтяпман”, деди Тимберлейк.
Хонанда гастрол сафари давомидаги изчил давом этган ишлар касаллик аломатларини яна кучайтириб юборганини айтди:
“Агар сиз ёки яқинларингиз шу дардга чалинган бўлса, ҳаётнинг бу касаллик билан ўтиши руҳий ва жисмоний жиҳатдан чидаб бўлмас даражада оғир эканлигини яхши биласиз. Менга илк бор ташхис қўйилганда шок ҳолатида эдим. Ҳеч бўлмаса шундан кейингина нега саҳнага чиққанимда кучли оғриқлар, чарчоқ ва кўнгил айниши бошланишини тушуна бошладим”, дейди Голливуд юлдузи.
Тўрт карра “Эмми” ва тўққиз карра “Гремми” совриндори бўлган Тимберлейк аввалига бир йил давом этадиган гастрол сафарини бекор қилишни ўйлаган, аммо кейинчалик бу синовга бардош беришга қарор қилган:
“Саҳнада қўшиқ куйлаш давомида олган завқим касалликдан кучлироқ бўлди. Мен таслим бўлмаганимдан хурсандман. Бу орқали ўзимга сабрли эканимни исботладим”, қўшимча қилди хонанда.
“Social Network” фильмида суратга тушган актёр аслида ташхисни ошкор этмоқчи бўлмаган, чунки болалигидан шахсий ҳаётни сир сақлашга ўрганган. Бироқ уни тўғри тушунишлари учун бу ҳақда гапиришга қарор қилган.
Бу баёнот санъаткорнинг Руминияда бўлиб ўтган Electric Castle мусиқа фестивалидаги чиқиши вақтида мухлислари томонидан кескин танқид қилинганига жавобан берилди. Чунки аввалроқ интернет фойдаланувчилари “Нега у концертга юзаки қараяпти?”, “Қўшиқдаги нечта сўзни ўзи куйлади?”, “600 доллар тўлаб, Жастин Тимберлейк қўшиқлари ўрнига одамлар куйлаётганини томоша қилдик” каби танқидий фикрларни билдирган эди.
- Эслатиб ўтамиз, супермодел Белла Ҳадид ва унинг онаси Ёланда, қўшиқчи Жастин Бибер, актёрлар Бен Стиллер ҳамда Эми Шумер ҳам Лайм касаллигига чалинган.
Изоҳ (0)