Яқин Шарқдаги можаронинг кескинлашуви фонида Эрон ва Исроил 2025 йилнинг иккинчи чораги якунларига кўра дунёнинг энг кўп хакерлар ҳужумига учраган бешта мамлакати қаторига кирди.
Маълум қилинишича, Исроил глобал рейтингда тўртинчи ўринни (барча ҳужумларнинг 8,4 фоизи), Эрон эса бешинчи ўринни (8,1 фоиз) эгаллаган ва сиёсий мотивли хактивистлардан рекорд даражадаги DDoS ҳужумларига дуч келган.
StormWаll тадқиқотига кўра, 2025 йилнинг иккинчи чорагида бутун дунё бўйлаб DDoS ҳужумлари сони ўтган йилнинг шу даврига нисбатан 108 фоизга ошган. Антирейтингда анъанавий равишда АҚШ етакчилик қилган, унга умумий ҳужумларнинг 12,6 фоизи тўғри келди. Ундан кейин Хитой (10,4 фоиз) ва Ҳиндистон (9,2 фоиз) туради. Мутахассислар уларнинг заифлигини ривожланган иқтисодиёт ва Ҳиндистон ҳамда Покистон ўртасидаги қарама-қаршилик каби геосиёсий можароларда иштирок этиши билан боғламоқда.
Илк ўнталикка Европа давлатлари ҳам кирган. Унда Германия олтинчи (7,6 фоиз), Буюк Британия еттинчи (7,3 фоиз) ўринни эгаллаган. Товламачиларнинг қизиқишидан ташқари, бу давлатлар ўзларининг сиёсий қарорларидан норози бўлган хактивистларнинг ҳаракатларидан зарар кўрган.
Анъанавий равишда энг кўп ҳужумга учраган давлатлар қаторида бўлган Россия 6,4 фоиз кўрсаткич билан саккизинчи ўринда жойлашган. Хакерлар ва сиёсий гуруҳларнинг ҳужумларидан ташқари, бу даврда мактаб ўқувчилари билан боғлиқ оммавий ҳодисалар қайд этилган. Улар Ягона давлат имтиҳонини ўтказиш ва олий ўқув юртларидаги қабул комиссиялари ишини издан чиқаришга уринишган.
Ўнталикни Саудия Арабистони (5,3 фоиз) ва Сингапур (5,1 фоиз) якунлаган. Саудия Арабистонининг жиноятчилар учун жозибадорлиги нефть-газ ва молия компанияларининг тўпланиши, шунингдек, унинг минтақадаги роли билан боғлиқ. Сингапур эса ривожланган иқтисодиёти туфайли муҳим нишон бўлиб қолмоқда.
Изоҳ (0)