Ўзбекистонда вазирлик ва идоралар раҳбарлари коррупцияга қарши курашишда фаол бўлиши лозим. Бу ҳақда 1 август куни ўтказилган йиғилишда Сенат раиси Танзила Норбоева айтиб ўтди.
Сенат ялпи мажлисида қонун устуворлигини таъминлаш, айниқса, коррупцияга йўл бермаслик масаласига эътибор қаратилди. Танзила Норбоеванинг таъкидлашича, коррупция — ривожланишни орқага тортадиган иллат.
“Ҳозирда Коррупцияга қарши курашиш миллий кенгаши белгилаб берилган устувор йўналишлар асосида ҳудудлар, соҳа ва тармоқларда кенг қамровли, ўрганиш ва таҳлиллар олиб бормоқда. Натижалар бевосита ҳудудларда, вазирлик, идораларда сайёр тарзда муҳокама қилиняпти. Бугунга қадар Миллий кенгашнинг сайёр мажлисларида Қорақалпоғистон Республикаси, Фарғона, Бухоро, Навоий, Жиззах, Сирдарё вилоятлари ҳамда Мактабгача ва мактаб таълими, Соғлиқни сақлаш вазирликлари тизимидаги ишлар ҳолати танқидий муҳокама қилинди. Кенг қамровли йўл хариталар қабул қилинди. Ишонч билдирилган 100 нафардан зиёд мансабдорга нисбатан лавозимдан озод этишгача бўлган қатъий чоралар кўрилди”, деди Сенат раҳбари.
Танзила Норбоева парламент ишчи гуруҳлари жойларда ўрганиш ва таҳлилларни давом эттираётганини айтди. Раис сўзларига кўра, бу масалада ҳозиргача олтита ҳудудга тааллуқли йўл харитаси тузилган. Қолган ҳудудларда ҳам ўрганиш ташкил этилади. Жойлардаги раҳбарлар нима ишлар билан бандлигини Сенат қўмиталари вакиллари текширади.
“Соҳа, тармоқларга келсак, дастлабки босқичда асосан бюджетдан энг кўп маблағ оладиган соҳаларга эътибор қаратилди, яъни улар — таълим ва тиббиёт. Бу қолган соҳалар, тизимлар эътибордан четда, дегани эмас. Коррупция исталган соҳада учраши мумкин. Шунинг учун барча соҳалар қамраб олинади. Вазирлик, идоралар раҳбарлари алоҳида ўрганишларни кутиб ўтирмасдан, мустақил равишда тегишли соҳаларда коррупциявий омилларни ўзлари аниқлашлари ва бартараф этиш бўйича ишларни фаоллаштириши лозим. Жумладан, Коррупцияга қарши курашиш агентлиги билан ҳамкорликда тизимли чора-тадбирлар ишлаб чиқиб, амалга оширишлари зарур. Сенат ва Миллий кенгаш бу борада ҳар қандай ёрдамга тайёр”, деди Танзила Норбоева.
Жорий йил 29 июлда президент ўтказган мажлисда Ўзбекистонда 75 фоиз коррупциявий жиноятлар маиший шаклда содир этилаётгани айтилган. Давлат раҳбари кўп ҳолларда коррупциянинг сабаблари четда қолиб, оқибати билан курашилаётганини танқид қилган. Коррупцияга йўл қўймайдиган превентив чоралар ҳали етарли эмаслигини таъкидлаган. Ҳар куни одамларнинг иши тушадиган ҳокимлик, кадастр, банк ва солиқ идораларида бюрократия, “коррупциявий туйнуклар” тўлиқ йўқолмагани қайд этилган.
Бош прокуратура коррупциявий омилларни аниқлаш ва бартараф этиш бўйича барча ҳудудларда йўл хариталари ишлаб чиқилиб, ижрога қаратилганини билдирганди.
Изоҳ (0)