“Қизим” сериалидаги роли билан томошабинларга яхши таниш бўлган актёр Талъат Йўлдошев YouTubeъдаги “Дарё лифестайле” каналига берган интервьюсида отасиз улғайгани сабаб 9 ёшидан ишлашга мажбур бўлгани ва муҳожирликни бошдан кечиргани ҳақида гапирди.
“9 ёшимда отамдан айрилганман”
— Дадам раҳматли темирйўлда ревизор бўлиб ишлаган. Унга Тошкентга келиб ишлаш таклифи кўп бўлган экан, аммо негадир рад этган. У республиканинг барча нуқталарига текширув билан борар, ҳалоллиги учун уни ҳурмат қилишар экан. Афсуски, дадам 43 ёшида вафот этди ва онам уч бола билан бева қолди. Акам касал эди, оғир иш қилса ёки нимадандир асабийлашса судурги тутиб, тоби қочарди. Шу боис, онамга кўмаклашиш учун 9 ёшимдан ишлашни бошлаганман. 8 йил давомида сартарошлик қилганман. Орада официантлик, чиптачилик ва пойабзал устачилигини ҳам қилиб, онамга ёрдамлашдим. 2008 йили дўстим хонанда Ҳамдам Собиров билан Россияга ишлагани борганмиз. У ерда ҳам қурилишда ишлаб, бир тийин пулсиз Ўзбекистонга қайтиб келганмиз, дейди Талъат Йўлдошев.
“Мусофирчиликдаги қийинчиликларни эслаш ҳам оғир”
— Онам боришимга қарши бўлган. Аммо оёқ тираб туриб олганман. Ҳамдамнинг оилавий шароити ҳам ёмон эди, хуллас, беш киши Россия қайдасан деб йўлга тушганмиз. Менга сартарош бўлишни айтишганди. Аммо боргандан кейин бир ой ишсиз юрдик, кейин қурилишга олиб боришди. Ўша ерда паспортларимизни олиб қўйиб, бизни сотиб юборишганини билганмиз. У ердаги қийинчиликларни сўз билан тасвирлаб бўлмайди. Одамнинг заррача қадри йўқ эди. Уйдагилар сиқилмасин деб телефонда кулиб гаплашардик, аммо ҳолимиз жуда хароб эди. Акамнинг бошида ўсимтаси борлиги учун ҳаво алмаштирар деган умидда уни ҳам олиб кетгандим. Аммо оғир шароит сабаб, ҳар куни ўзини йўқотиб, хушдан кетадиган бўлиб қолди. Иш берувчиларга акамни уйга жўнатиб юборайлик, десам йўқ дейишди. Ҳатто, бунинг учун 3 500 рубль беришимни сўрашди. Ҳеч эсимдан чиқмайди ўша куни битта руснинг уйига бориб, ҳожатхона учун ўра қазигандим. Аммо жуда қўрққанман, чунки ўша пайтларда баъзилар пул бермаслик учун ўра қазиётган ишчининг устидан тупроқ ташлаб, ўлдиришгани ҳақидаги гаплар қулоғимга чалинганди. Кечгача ишлаб, етарли пулни иш берувчига олиб келганман, шундан кейингина у бемор акамнинг уйга қайтишига рухсат берган. Ҳар куни текширув келарди, улгурган беркинарди ёки уриб-туртиб маҳкамага кетарди. Ўшанда ўз-ўзимга қайтиб Россияга ишлаш учун келмайман, деб ваъда бергандим, дейди актёр Талъат Йўлдошев.
“Оиланинг ёлғиз эркагиман...”
— Баъзан катта-кичик давраларда ўтирганимизда “Унчалик машҳур бўлиб кетмадингиз, сиз истеъдодли актёрсиз”, деган гапларни айтиб қолишади. Одамларга муаммоларингизни билмай туриб, баҳо бериш осон. 2008 йили институтга кирдим, олти ой ўтар-ўтмай акам вафот этди. Ундан кейин опамнинг турмуш ўртоғи оламдан ўтди. Опам 3 та қизи билан қайтиб келди. Ўша пайтда жиянларим 5-6 ёшдаги қизалоқлар эди. Рўзғор юкини елкамга илишга ва беш аёл учун масъул бўлишга мажбур бўлдим. Жиянларимни ўқитиб, уларнинг иккитасини турмушга бердик. Тан оламан, ижодни эмас, баъзида пулни ўйлашга мажбурман. Чунки уйимиз йўқ, бир неча йилдан буён Тошкентда ижарада яшаймиз. Бунинг қанчалик қийинлигини ижарада яшайдиганлар яхши билишади, дейди Талъат Йўлдошев.
“Бировга ишониб уйсиз қолганман”
— Уй қурувчи жуда машҳур фирма билан реклама бўйича ишлаганман. Фалон суммани берсангиз, уйли бўлишингизга ёрдам бераман дейишди. Уйни текинга беришмасди, уларнинг пиари билан шуғулланишим ва келишув асосида топган пулимни бериладиган уйга йўналтиришлари керак эди. Тошкентга келиб ишлари юришиб кетганидан кейин негадир фикрлари ўзгарди. Мен эса Навоийдаги уйни сотиб бўлгандим, пулни бизнесга тикдим, аммо орада аварияга учраганим учун у ишим ҳам ўхшамади. Хуллас, қурувчининг ваъдасига ишониб оила аъзоларимни уйсиз қолдирдим. Бу мен учун оғир зарба бўлди, дейди актёр.
Суҳбатни тўлиқ ҳолда томоша қилишингизни тавсия қиламиз.
Изоҳ (0)