Америкалик хонанда Женнифер Лопес жорий йил август ойида Москвада бўлиши режалаштирилган концертини сўнгги дақиқаларда бекор қилди. Маш нашри хабар беришича, бунга Россиянинг халқаро майдондаги сиёсий вазияти ва хонанданинг обрўсига путур етиш хавфи сабаб бўлган.
Концерт ташкилотчилари бундан уч ой аввал Лопеснинг менежерлари билан келишувга эришган ҳамда шоунинг барча тафсилотларини муҳокама қилган эди. Концерт Москвадаги энг йирик ареналардан бирида ўтиши керак эди ва чипта сотуви ҳам бошланиш арафасида эди. Оn the Floor ҳит қўшиғи муаллифи ушбу концертда камида 1 миллион АҚШ доллари ишлаб олиши мумкин эди.
Аммо қўшиқчи концерт бошланишига бир неча кун қолганда қарорини ўзгартирди. Продюсер Павел Рудченко буни қуйидагича изоҳлади:
“Ғарбда Россия билан ҳамкорлик қилиш масаласига жуда эҳтиёткорлик билан ёндашилмоқда. Машҳур санъаткорлар эса сиёсатдан четда эмас, улар ҳам обрў-эътиборини ҳамда ўз бизнесини асрашга мажбур. Трампнинг Россияга ва бу мамлакат билан ҳамкорлик қилаётганларга қарши янги санкциялар жорий қилиш ҳақидаги қарори эса санъаткорларни хавотирга солади. Шу сабабли кўпчилик бундай муаммоли вазиятларга тушиб қолишни истамайди”, дейди Рудченко.
Женнифер Лопес бу сафар Москвага кела олмаган бўлса-да, келажакда Россияда концерт бериш режасидан бутунлай воз кечмаганини билдирган.
Аввалроқ Женнифер Лопес ўнлаб мамлакатларни қамраб оладиган Up All Night: Live in 2025 катта концерт турини эълон қилгани, улар орасида биринчи марта Ўзбекистон ҳам борлиги ҳақида хабар берилганди. Шоу дастури 7 август куни Тошкентдаги “Бунёдкор” стадионида бўлиб ўтади.
Женнифер Лопеснинг ўнлаб мамлакатларни қамраб оладиган Up All Night: Live in 2025 катта концерт тури АҚШ, Европа, Осиё, жумладан, Қозоғистон, Арманистон ва Ўзбекистонда бўлиб ўтади.
Маълумот учун: Женнифер Лопес 1969 йил 24 июль Нью Йорк шаҳрида дунёга келган америкалик актриса, қўшиқчи, раққоса, моделер, продюсер ва ишбилармон аёл. У биринчи марта 1991 йилда In Living Color телекўрсатувида Fly Girl раққосаси сифатида машҳурликка эришган. У 1993 йилгача актрисалик фаолиятини бошлашга қарор қилгунга қадар жамоанинг доимий аъзоси бўлиб қолган. Лопес ўзининг биринчи бош ролини 1997 йилда қўшиқчи Селена ҳақидаги биографик фильмда ижро этган. Бу рол унга “Олтин глобус” номинациясини олиб келган.
Изоҳ (0)