Мазкур юлдузлар шон-шуҳрат чўққисида кинони тарк этиб, миллионлаб мухлисларни ҳайратда қолдирди. Уларни кетишга нима мажбур қилгани, энг муҳими эса нима сабабдан қайтишга қарор қилганлари ҳақида гаплашамиз.
Кемерон Диас
21 ёшида Кемерон Диас “Ниқоб” фильмида Тина Карлайл ролини ижро этиб, катта кино оламига тўсатдан кириб келди. Дебютдан тўрт йил ўтгач, Диас “Ҳамма Мерини деб ақлдан озган фильмидаги ажойиб ижроси учун “Олтин глобус” мукофотини қўлга киритди ва фақат чиройли ташқи кўринишга эга эмаслигини исботлади.
Унинг фильмографиясида Мартин Скорсезенинг “Нью Йорк тўдалари” фильмидаги ёрқин драматик роли ва “Чарли фаришталари” хити ҳам бор. Албатта, “Шрек” мультфильмида малика Фионага овоз берганини ҳам унутмаслик керак.
2014 йилда у кинони тарк этишини эълон қилиб, жамоатчиликни ҳайратда қолдирди. Доимо сафарда яшаш ўрнига, у оиласига эътибор қаратишни афзал кўрди. Ҳар қачонгидан ҳам кўпроқ бўш вақтга эга бўлгач, у саломатлик ҳақида китоблар ёзди ва органик шароб брендини яратди.
Муддатсиз таътил кутилмаганда Жейми Фокснинг қўнғироғи билан тўхтади. У Диасни “Яна ишда” комедия жанр фильмига таклиф қилди. Унда истеъфодаги икки жосуснинг яна ишга қайтиши ҳақида ҳикоя қилинади.
Рене Зеллвегер
Рене Зеллвегернинг карьерасидаги бурилиш 2001 йилда “Брижит Жонс кундалиги” фильми экранларга чиқиши билан юз берди. Бу фильм унинг ташриф қоғозига айланди. Картина шуҳрат қозонди, актриса эса илк бор “Оскар” мукофотига номзод бўлди. 2002 йилда Зеллвегер “Чикаго” мусиқали фильмида рол ижро этди ва яна мукофотга номзоди қўйилди. Ниҳоят, бир йил ўтгач, у “Совуқ тоғ” драмасидаги иккинчи даражали аёл роли учун мукофотни қўлга киритди.
2010 йилдан кейин Зеллвегер кутилмаганда олти йил давомида экранлардан ғойиб бўлди. Кейинчалик суҳбатда юлдуз ҳолдан тойганини айтди. Таътилда у кўп саёҳат қилди, мусиқа билан шуғулланди ва ҳатто ҳуқуқшуносликни ўрганди. 2016 йилда “Брижит Жонс 3” фильми билан ҳаммаси яна ўз изига тушди. Уч йил ўтгач, у Жуди Гарленднинг фожиали тақдири ҳақидаги “Жуди” фильмидаги роли учун иккинчи “Оскар” ва тўртинчи “Олтин глобус” мукофотлари билан тақдирланди.
Бу йил Зеллвегер “Брижит Жонс” франшизасининг тўртинчи қисмида уни машҳур қилган ролни яна ижро этди.
Мег Райан
90 йилларнинг романтик комедия қироличаси унвони учун Мег Райан билан баҳслаша оладиганлар камдан-кам топилади. Унинг Том Хенкс билан суратга тушган “Сизга хат” ёки “Сиэтлдаги бедорлар” каби асарларини эслашнинг ўзи кифоя — бу фильмлар унга “Олтин глобус” номинациясини келтирган. Ундан олдинроқ эса “Гарри Салли билан учрашганда” фильмидаги ажойиб роли учун ҳам номзод бўлган эди.
Бироқ 2000 йилларда унинг карьераси туша бошлади. Актриса доим янги нарсаларни синаб кўришни истарди, аммо тажрибалар кутилган натижани бермади. “Эҳтироснинг қоронғи томони” филимдаги роли учун Райан шу пайтгача бутун карьераси давомида дуч келмаган танқидга учради. Аммо у фақат 2009 йилда танаффус эълон қилди. Матбуот буни муваффақиятсиз пластик жарроҳлик оқибатлари билан боғлади.
2013 йилда у Лиса Кудроунинг “Веб терапия” ситкомида эпизодик рол ижро этди. Икки йилдан сўнг эса ўзининг режиссёрлик дебюти — “Итака” драмаси билан чиқди. Фильм турли баҳоларга сазовор бўлди ва Райан буни ижодий чарчаш билан изоҳлаган ҳолда яна танаффус олди.
Янги босқич 2023 йилда унинг иккинчи режиссёрлик асари — “Кейин нима бўлади” фильми чиқиши билан бошланди. Ушбу фильмда у Девид Духовни билан ҳамкорликда рол ўйнади ва кўп йиллик айрилиқдан сўнг аэропортда тасодифан учрашган собиқ севишганларни экранда гавдалантирди.
Изоҳ (0)