Россиянинг Санкт Петербург шаҳрида патентга эга бўлган муҳожирларнинг такси хизматларида ишлаши тақиқланди. Тегишли қарор губернатор Александр Беглов томонидан имзоланди.
Ҳужжат 10 кундан кейин кучга киради. Тақиқ 2025 йил охиригача жорий этилмоқда. Қарорда иш берувчилар учун уч ойлик ўтиш даври назарда тутилган. Бу вақт ичида компанияларга такси ҳайдаш учун “патент асосида меҳнат фаолиятини амалга ошираётган чет эл фуқароларини” ишдан бўшатиш ва янги ишчиларни жалб қилиш буюрилган.
Чеклов такси хизматлари сифати ва хавфсизлигини оширишга, “Россия фуқароларини иш билан таъминлаш учун қўшимча имкониятлар” яратишга имкон беради, дейди ҳукумат.
Июль ойи бошида Санкт Петербург парламенти спикери Александр Белский мигрантларга таксичиликни тақиқлаш “коллапс юз бериши”га олиб келишини айтган эди.
Биз бундай қарорларни қабул қилар эканмиз, Санкт Петербург яқин атрофдаги минтақалар учун қандай чангютгич бўлишини ўйлашимиз керак. Псков, Новгород, Ленинград вилоятлари. Ишчи кучи Петербургга оқиб келади. Далаларда ким ишлайди? Ҳамма таксига ўтиб кетади, деган эди у.
2025 йил январь ойида Россиянинг 49 та минтақасида (шу жумладан, аннексия қилинган Украина ҳудудлари) мигрантларнинг ишлашига турли даражадаги чекловлар жорий этилганди. Амалда тақиқ объектлари асосан Ўзбекистон ва Тожикистондан келган ишчилар бўлган, деб ёзган эди “Верстка” нашри.
Бунга 2024 йил март ойида Crocus City Hall’даги терактдан кейинги муҳожирларга қарши чоралар сабаб бўлган. Ленинград, Омск, Магадан, Тюмен, Челябинск ва бошқа вилоятларда, шунингдек, Татаристон ва Камчаткада мигрантлар учун таксичилик фаолиятига тақиқ жорий этилган.
Изоҳ (0)