Саудия Арабистонининг Риёд шаҳри шахмат бўйича энг нуфузли мусобақалардан бири — Esports World Cup турнирига мезбонлик қилади. Чемпионат 29 июль, сешанба куни бошланади ва 1 август куни якунланади. Унда Ўзбекистон шарафини икки шахматчи — Нодирбек Абдусатторов ва Жавоҳир Синдоров ҳимоя қилади.
Нодирбек Абдусатторов Chess.com Классик турнирида тўплаган очколари эвазига турнирга тўғридан-тўғри йўлланма олган бўлса, Жавоҳир Синдоров эса EWC саралаш босқичида муваффақиятли иштирок этиб, мусобақа чиптасига эга чиқди.
Мусобақада дунёнинг энг кучли 16 нафар шахматчиси иштирок этади. Магнус Карлсен, Максим Ваше-Лаграв, Нодирбек Абдусатторов, Фабиано Каруана, Аржун Эригайси, Ҳикару Накамура, Алиреза Фирузжа, Владимир Федосеев, Владислав Артемев, Ян-Кшиштоф Дуда, Вей Ли ва Ян Непомняший турнир йўлланмасини жамғарган очколари эвазига қўлга киритган. Ниҳол Сарин, Аниш Гири, Левон Арониян ва Жавоҳир Синдоров эса саралаш босқичида муваффақиятли қатнашиб, мусобақада иштирок этиш ҳуқуқига эга чиқди.
Esports World Cup мусобақасининг соврин жамғармаси 1,5 миллион долларни ташкил қилади. Мусобақа ғолиби 1-ўрин учун 250 минг доллар, 2-ўрин эгаси 180 минг доллар, 3 ва 4-ўрин эгалари эса 125 минг доллардан мукофот олади. 5–8-ўрин эгалари 90 минг, 9–12-ўрин эгалари 65 минг, 13–16-ўрин эгалари эса 50 минг доллар миқдорида мукофот пули билан тақдирланади.
Изоҳ (0)