Ўзбекистон президенти ҳузуридаги Хавфсизлик кенгаши котиби ўринбосари ва иккита шўба мудирлари лавозимидан озод этилди. Бу ҳақда 25 июль куни президент матбуот котиби Шерзод Асадов хабар берди.
Талъат Валиев Президент ҳузуридаги Хавфсизлик кенгаши котибининг жамоат хавфсизлиги масалалари бўйича ўринбосари лавозимидан озод этилди. Бу бўйича Ўзбекистон президентининг фармони қабул қилинган.
Президент администрацияси фармойиши билан Баҳодир Маҳмудов Хавфсизлик кенгаши аппарати Инсон ҳуқуқлари соҳасидаги халқаро мажбуриятларни амалга оширилишини таъминлаш ва халқаро гуманитар ҳамкорлик шўбаси мудирлигидан бўшатилди. Шу билан бирга, Шовқиддин Қаршиев кенгаш аппарати Давлат чегараси хавфсизлиги ва ҳудудларни фавқулодда вазиятлардан ҳимоя қилишни таъминлаш шўбаси бош консултанти лавозимидан озод этилди.
Жорий йил июнь ойида давлат раҳбари фармони билан Президент администрацияси тузилмасига ўзгартиришлар киритилди. Ҳужжат асосида янги ташкил этилган Президент администрацияси раҳбари лавозимига Саида Мирзиёева тайинланди. 14 июль куни эса администрацияда қатор янги лавозим тайинловлари эълон қилинди. Хусусан, тузилма раҳбарига беш нафар ўринбосар лавозими жорий этилди. Президент фармонига мувофиқ, администрация таркибидаги ташкилотларда 284 та штат қисқартирилган, такрорланувчи лавозимлар оптималлаштирилган.
Фармонга кўра, лавозимлари ўзгаришсиз қолдирилган раҳбар ходимлар орасида Хавфсизлик кенгаши котиби Виктор Маҳмудов ҳам бор эди.
Маълумот учун, Хавфсизлик кенгаши — Президент ҳузуридаги муҳим маслаҳатчи ва мувофиқлаштирувчи орган ҳисобланади. У давлатнинг хавфсизлик стратегиясини, жамоат хавфсизлиги, мудофаа, ташқи ва ички сиёсат йўналишларини шакллантиришда марказий рол ўйнайди. Конституцияда Ўзбекистон президенти Хавфсизлик кенгашини тузиши ва унга бошчилик қилиши белгиланган.
Изоҳ (0)