“Сиз халқимиз учун яшаяпсиз” — Саида Мирзиёева Шавкат Мирзиёев ҳақида

Президент администрацияси раҳбари Саида Мирзиёева 24 июль куни Шавкат Мирзиёевни туғилган куни билан табриклади. 

“Туғилган кунингиз қутлуғ бўлсин, дадажон! Сиз мен учун ҳар доим донишмандлик ва куч-қудрат тимсоли бўлиб келгансиз. Мен сизнинг чексиз меҳрингиздан қувват олиб улғайдим.

Дадажон! Тун-у кун сизнинг ўй-хаёлингиз нималар билан банд эканини яхши биламан. Сиз халқимиз учун яшаяпсиз. Умрингизни шу юртга, унинг тинчлиги, одамлар фаровонлигига бағишлагансиз. Чунки сиз фақат оиламизнинг эмас, бутун бир миллатнинг отасисиз.

Мен сизнинг бемисл меҳр-муҳаббатингиз, фидойи хизматларингиз, барча машаққатларни енгишда кўрсатаётган матонатингиз олдида бош эгаман.

Аллоҳдан фақат бир нарсани сўрайман — сизни доим ўз паноҳида асрасин. Мен учун. Ҳаммамиз учун...”, дейилади табрикда.

Ўзбекистон президенти 24 июль куни 68 ёшни қарши олди. Шу муносабат билан хорижий давлатлар, ҳукуматлар, парламентлар, нуфузли халқаро ташкилотлар, етакчи хорижий компаниялар раҳбарлари, таниқли жамоат, дин ва спорт арбоблари, мамлакатнинг барча ҳудудлари ва хориждаги фуқаролардан қутловлар келмоқда. Жумладан, Россия, Беларусь, Озарбайжон, Мўғулистон, Қирғизистон, Тожикистон, Жанубий Корея, Туркия президентлари телефон орқали мулоқотда Шавкат Мирзиёевни табриклади.