O‘zbekiston prezidenti 24-iyul kuni 68 yoshni qarshi oldi. Davlat rahbari matbuot kotibi shu munosabat bilan xorijiy davlatlar, hukumatlar, parlamentlar, nufuzli xalqaro tashkilotlar, yetakchi xorijiy kompaniyalar rahbarlari, taniqli jamoat, din va sport arboblari, mamlakatning barcha hududlari va xorijdagi fuqarolardan qutlovlar kelayotganini bildirdi.
“Maktublarda O‘zbekiston prezidenti rahbarligida aholi farovonligini oshirish, mamlakat barqarorligi va izchil taraqqiyotini ta’minlash, uning xalqaro nufuzini mustahkamlashga qaratilgan ortga qaytmas siyosiy islohotlar va ijtimoiy-iqtisodiy yangilanishlar dasturini samarali amalga oshirish borasida erishilgan yuksak natijalar qayd etilgan.
Prezidentimizga mustahkam sog‘lik va mas’uliyatli davlatchilik faoliyatida yangi muvaffaqiyatlar, O‘zbekistonning ko‘p millatli xalqiga esa tinchlik-osoyishtalik, farovonlik va ravnaq tilaklari izhor etilgan”, dedi Sherzod Asadov.
Uning qayd etishicha, 24-iyulda davlat rahbarining ko‘plab mamlakatlar yetakchilari bilan telefon orqali muloqotlari rejalashtirilgan.
O‘zbekiston prezidenti 68 yoshni qarshi oldi
Shavkat Mirziyoyev 1957-yil 24-iyulda Jizzax viloyatining Zomin tumanida shifokor oilasida tug‘ilgan. 1981-yili Toshkent irrigatsiya va qishloq xo‘jaligini mexanizatsiyalash muhandislari institutini tugatgan.
U 2003-yilda O‘zbekiston bosh vaziri etib tasdiqlanib, 2016-yilga qadar faoliyat yuritgan. 2016-yil 4-dekabr kuni bo‘lib o‘tgan prezident saylovi yakunlari bo‘yicha saylovchilarning 88,61 foiz ovozi bilan O‘zbekiston prezidenti etib saylangan. 2021-yil 24-oktyabr kuni bo‘lib o‘tgan prezident saylovida 80,1 foiz ovoz bilan 7 yil muddatga O‘zbekiston prezidenti etib qayta saylangan. 2023-yil 9-iyulida bo‘lib o‘tgan saylovda esa Shavkat Mirziyoyev 87,05 foiz ovoz olib, g‘olib bo‘lgandi. 14-iyulda tantanali qasamyod qilib, o‘z lavozimiga kirishdi. U “Mehnat shuhrati” va “Fidokorona xizmatlari uchun” ordenlari bilan taqdirlangan.
Izoh (0)