Ўзбекистонда 3 мингдан зиёд қадимий тангалар ноқонуний олиб ўтилишининг олди олинди, деб хабар бермоқда Божхона қўмитаси.
Унга кўра, 2024 йилда ҳамда жорий йилнинг ўтган 6 ойи давомида божхона органлари томонидан 299 та ҳуқуқбузарликлар аниқланиб, ушбу ҳолатлар бўйича 5 981 та маданий бойликларнинг ноқонуний олиб ўтилишининг олди олинди.
Жумладан, 3 055 та қадимий тангалар, 706 та муомалада бўлмаган пул банкнотлари, 1 212 та орден ва медаллар, 118 та санъат асарлари, 46 та ҳайкалтарошлик асарлари, 29 та қадимий китоб ва қўлёзмалар, 3 та археологик ашёлар, 14 та қадимий мусиқа асбоблари, 424 та ҳунармандчилик буюмлари, 358 та қадимий заргарлик буюмлари, 14 та фотоматериаллар, 1 та архитектура ёдгорлиги қисми ва 1 та қадимий қурол-аслаҳа аниқланган.
Мазкур ҳолатлар юзасидан божхона органлари томонидан 4 та ҳолатда жиноят ишлари қўзғатилган, 295 та ҳолатда эса маъмурий ишлар юритилиб кўриб чиқиш учун судларга юборилган.
Божхона органлари томонидан тўхтатиб қолинган мазкур маданий бойлик объектлари республика бўйича жами 28 та музейларга топширилган. Эндиликда ушбу музейлар қаторидан Ўзбекистондаги Ислом цивилизацияси маркази музейи ҳам жой олади.
Айтилишича, шу муносабат билан тадбир доирасида иккала ташкилот раҳбарлари “Божхона органлари томонидан ушлаб қолинган маданий бойликларни Ўзбекистондаги Ислом цивилизацияси марказига топширишда ўзаро ҳамкорлик қилиш тўғрисида” меморандумни имзолади.
Маълумот учун, “Маданий бойликларнинг олиб чиқилиши ва олиб кирилиши тўғрисида”ги қонуннинг 8-моддасига биноан эллик йил муқаддам ва ундан ҳам олдинроқ яратилган маданий бойликларни Ўзбекистондан олиб чиқилиши мумкин эмас.
Изоҳ (0)