“Калмар ўйини”дан сўнг яна психологик ўйинлар ва хавфли синовлар оламига шўнғишни истасангиз, ушбу корейс дорамаларини томоша қилишни тавсия этамиз. Улар ҳам худди шундай кучли ҳаяжон билан томошабинни ўзига жалб қилади.
“Тун чўкди”
Ўқувчилар имтиҳонларни муваффақиятли топширганлари учун мукофот сифатида тоғдаги дам олиш масканига жўнашади. Бироқ биринчи тун бошланиши билан ҳар бир ўқувчи сирли хабар олади. Шундай қилиб, улар мафия ўйини иштирокчисига айланганликларини билиб қолишади.
Қоидалар ҳаммага таниш: уларнинг орасида мафия аъзолари, тинч фуқаролар ва шериф бор. Ҳар кечада кимни ўйиндан чиқариш кераклигини ҳал қилиш лозим. Аммо кўп ўтмай ўқувчилар даҳшатли ҳақиқатни англайди: ўйиндан чиққанлар чиндан ҳам ҳалок бўлишади. Ўйинни тўхтатишнинг иложи йўқ — у охиригача давом этаверади.
“Севимли уй”
“Севимли уй” драмасининг бош қаҳрамони 18 ёшли мактаб ўқувчиси Ча Хён-су бўлиб, у даҳшатли аварияда бутун оиласидан айрилган. Йиллар ўтиб у кўп қаватли уйга кўчиб ўтади, бироқ тез орада қўшниларнинг махлуқларга айланаётганини пайқайди. У омон қолиш учун уйнинг бошқа аҳолиси билан бирлашишига тўғри келади.
“Пирамида ўйини”
Бош қаҳрамон — ёқимтой ва тиришқоқ Су Жи нуфузли хусусий мактабга ўтади. Синфдошлари аввалига уни яхши кутиб олишади, аммо тез орада қиз шафқатсиз ички қоидаларни билиб қолади. Ҳар ойда синф энг “заиф” ўқувчини сайлайди ва шу пайтдан бошлаб ҳамма уни масхара қилиши мумкин бўлади. Кейинги сайловда кўпроқ овоз олсангизгина бу таъқибни тўхтатиш мумкин.
Сериал Жанубий Корея учун долзарб мавзу - мактабдаги зўравонликни кўтаради. Бу ерда ижтимоий иерархиянинг қанчалик шафқатсиз бўлиши, битта хато сизни "пирамида" чўққисидан тубига улоқтириб ташлаши мумкинлиги аниқ кўрсатилган.
“Қора туйнук”
“Қоронғу туйнук” сюжетининг марказида яқинда эрини йўқотган аёл —детектив Ли Хвансон туради. У эрининг қотилини топиш учун астойдил ҳаракат қилади. Тергов уни Мужи деган кичик шаҳарчага олиб келади, у ерда ғалати воқеалар содир бўла бошлайди.
Ўрмонда чуқур туйнук пайдо бўлади, ундан қора тутун чиқади. Бу тутунга тегишга журъат этганлар инсонийлигини йўқотиб, йўлида учраган ҳамма нарсани йўқ қиладиган шафқатсиз зомбиларга айланади. Энди Ли Хвансон бу ғайриоддий ҳодиса ортида нима турганини аниқлаши ва яқинлашиб келаётган тартибсизликни тўхтатиши керак.
Изоҳ (0)