Депутат Алишер Қодиров фикрича, пойтахтдаги пиво фестивали ташкилотчилари жавобгарликка тортилиши лозим. Чунки Ўзбекистонда спиртли ичимликлар рекламаси ва тарғиботи қонунан тақиқланган.
Жорий йил 27—29 июнь кунлари Тошкент шаҳрининг Тарас Шевченко кўчасида пиво фестивали ўтказилган.
“Миллий тикланиш” партияси раиси ўринбосари Феруза Муҳамеджонова: “бу тадбир халқнинг миллий анъана ва ўзлигига тупуриш”, дея кескин муносабат билдирди. Партия раиси Алишер Қодиров ҳамкасби фикрларига қўшимча равишда фестивал ташкилотчилари жазоланиши лозимлигини таъкидлади.
Депутат Telegram’даги каналида ёзган постида “Реклама тўғрисида”ги қонунни эслатган. Қонунда ҳар қандай алкоголли ичимликлар рекламаси, алкоголли ичимликлар номи, белгиси ёхуд тасвиридан фойдаланиладиган тадбирларда ҳомийлик қилиш тақиқланганига урғу берган.
“Бу фестивални ўтказган ва ўтказишга рухсат берганлар жавобгарликка тортилиши керак”, дея фикр билдирган партия раҳбари.
Аввалроқ Феруза Муҳамеджонова пойтахтда пиво фестивалини ҳар йили ўтказиш анъанага айланиб бораётганидан хавотир билдирганди.
“Пиво фестивалини айнан Тошкентда ўтказиш — бу шунчаки фаоллар ёки бизнес ташаббуси эмас, балки халқни миллий анъаналари ва ўзлигига тупуришдир. Бугун пиво, эртага вино, кейин спиртли барлар ҳеч қандай маданий чекловсиз тадбирлар — шундай кетма-кетликда жамиятни сездирмасдан ўзгартириш мумкин. Албатта, кимнинг нима ичиши унинг шахсий танлови. Лекин бу танлов жамоат жойида, бутун жамият кўз ўнгида тарғиб этилишига йўл қўйиб бўлмайди. Эркинлик тушунчаси маданиятсизлик ва ҳадсизликка аралашиб кетса, бу жамиятнинг ўзлигини йўқотишидан дарак”, деб ёзган партия вакили Facebook’да.
“Реклама тўғрисида”ги қонунда алкоголли ичимликлар тарғиботига йўл қўйилмаслиги қатъий белгиланган. Хусусан, рекламаларда бундай маҳсулотлар истеъмоли муваффақиятга эришиш, жисмоний ёки руҳий ҳолат яхшиланишига олиб келишини ифодалаш тақиқланади. Қонунга кўра, пивони реклама қилишда маданий-кўнгилочар, оммавий ва спорт тадбирларига ҳомийлик қилишга йўл қўйилмайди.
Изоҳ (0)