Ҳужумчи Криштиану Роналду “Ливерпуль” ва Португалия терма жамоаси аъзоси Диогу Жота, шунингдек унинг укаси — “Пенафиэл” футболчиси Андре Сильванинг фожиали вафоти муносабати билан ўз фикрини билдирди.
Роналду ўзининг ижтимоий тармоқдаги саҳифасида қуйидаги сўзларни ёзиб қолдирди:
Бу ҳеч қандай маънога эга эмас... Биз яқиндагина терма жамоада бирга эдик, Жота яқинда оила қурган эди... Сизларнинг оилаларингизга, рафиқаларингизга ва фарзандларингизга чуқур ҳамдардлик билдираман, уларга сабр ва куч тилайман. Биламан, сизлар ҳар доим улар билан бўласиз. Тинч ётинглар, Диогу ва Андре. Биз сизларни жуда соғинамиз.
Маълумот учун, Криштиану Роналду ва Диогу Жота узоқ йиллардан бери Португалия терма жамоаси шарафини ҳимоя қилиб келаётган футболчилардан саналади. Улар 2025 йил 9 июнь куни бўлиб ўтган Миллатлар Лигаси финалида Испанияни мағлуб этиб, жамоа билан бош совринни қўлга киритган эди.
Эслатиб ўтамиз, 2025 йил 3 июль оқшомида 28 ёшли Диогу Жота ва 25 ёшли Андре Сильва Испанияда юз берган оғир йўл-транспорт ҳодисасида ҳалок бўлган. Дастлабки маълумотларга кўра, Lamborghini русумидаги автомобиль юқори тезликда ҳаракатланиб кетаётган пайтда шиналардан бири ёрилиб кетган. Ғилдирак портлаганидан сўнг бошқарувни йўқотиб, йўлдан чиқиб кетган ва ёниб кетган.
Изоҳ (0)