Тошкентдаги барча чартер рейслар “Тошкент—Шарқий” аэропортига кўчирилади. Бу ҳақда Uzbekistan Airways бошқаруви раиси Шуҳрат Худойқулов “Ўзбекистон 24” телеканалида берган интервьюсида маълум қилди.
Унинг қайд этишича, сўнгги 7−8 йилда йиллик йўловчилар оқими ўртача 20 баробарга ошди. Ҳозирда Тошкент халқаро аэропортида кунига 10 дан ортиқ чартер рейслар амалга оширилади. Уларнинг барчаси реконструкция қилинаётган аэропортга кўчирилади.
Шавкат Мирзиёев 18 июнь куни “Тошкент—Шарқий” аэропорти қурилишини кўздан кечирганди. Аэропорт юқори халқаро стандартларга жавоб берадиган тез, хавфсиз ва қулай қатновларни таъминлаш, шунингдек, пойтахтнинг асосий халқаро аэропортига юкламани енгиллаштиришга мўлжалланган. 4 километр узунликдаги учиш-қўниш йўлаги янгиланиб, энг оғир самолётларни ҳам қабул қилиш қувватига эга бўлди.
Ҳозирги кунда юқори мартабали меҳмонлар ҳамда бизнес-авиация учун 2 та терминал, перрон ва ангарлар барпо этилмоқда. Аэропорт ноқулай об-ҳаво шароитларида ҳам учиш-қўнишни таъминловчи ICAO III-А тоифасидаги илғор радиотехника ва метеорология ускуналари билан жиҳозланади. Бу туман ва кўриш нолга тенг бўлган шароитда ҳам парвозларни қабул қилиш имконини беради.
Тақдим этилган бош режага кўра, ушбу аэропортнинг умумий майдони 561 гектарни ташкил этади. Йўловчи терминали соатига 100 кишигача хизмат кўрсатади. Аэродром перронида бир вақтнинг ўзида 23 та икки палубали Boeing-747 самолётлари сиғиши мумкин бўлади. Ёпиқ ангарларда самолётлар соз ва хавфсиз сақланиши учун замонавий шароитлар таъминланади.
Шуҳрат Худойқуловнинг билдиришича, аэропорт яқин кунларда фойдаланишга топширилади.
Собиқ ҳарбий аэродром негизида янги аэропорт қурилиши президентнинг 2017 йил 30 июндаги қарорига мувофиқ амалга оширилмоқда. Шавкат Мирзиёев 2023 йилнинг июль ва 2024 йилнинг сентябрь ойларида ҳам “Тошкент—Шарқий” аэропорти қурилишини кўздан кечирганди. Қурилиш ишларини молиялаштириш, терминалнинг ташқи кўриниши ва делегациялар учун қулайликларни қайта кўриб чиқиш бўйича топшириқлар берганди.
Изоҳ (0)