“Толибон” ҳаракати Афғонистоннинг Дайкунди вилоятида стол футболини ўйнашни тақиқлади. Улар ўйиндаги футболчи фигуралар бутларга ўхшашини айтган. Бу ҳақда Afghanistan International хабар берди.
“Толибон” стол футболи ўйинини давом эттириш учун клубларга шарт қўйган. Бунинг учун футболчи фигураларнинг бош қисмлари олиб ташланиши керак. Бу кўрсатмага риоя қилинмаса, ўйинга тўлиқ тақиқ жорий этилади. Ҳукумат бу бўйича ҳали расмий баёнот бермаган.
Сўнгги тўрт йил ичида “Толибон” ҳукумати Афғонистонда турли спорт ва кўнгилочар ўйинларга нисбатан чекловларни кучайтирган. Айримларини эса бутунлай тақиқлаб қўйган. Май ойида “Толибон”нинг спорт бўйича расмийлари Афғонистон шахмат ўйнашни тақиқлаб, уни “ҳаром” деб атаганди.
Мазкур фармонни Афғонистон амири шахсан имзолаган, ташаббус эса Эзгу ишларни тарғиб қилиш ва ёвузликнинг олдини олиш вазирлиги томонидан илгари сурилган.
9 май куни афғонистонлик шахматчилар мамлакатдаги Спорт ва жисмоний тарбия бўйича департаментга мурожаат қилиб, шахмат ўйнашга рухсат беришни, шунингдек, тўгараклар ва мусобақалар ташкил этиш учун молиявий ёрдам ажратишни сўраган. Бироқ “Толибон” расмийлари буни бажаришдан бош тортганди.
Таъкидлаш керакки, бу Афғонистонда шахмат илк бор тақиқланиши эмас. 1996–2001 йиллардаги аввалги “Толибон” бошқаруви даврида ҳам нафақат шахмат, балки бошқа кўнгилочар машғулотлар — мусиқа, телевидение ва интернет ҳам тақиқланганди. Ўша пайтда бу фаолиятлар диний мажбуриятлардан чалғитади ва қиморбозликни ривожлантиради, деб ҳисобланган.
Изоҳ (0)