Тошкент вилояти Олмалиқ шаҳрида мактаб ўқувчилари сувдан заҳарланди. Бу ҳақда вилоят мактабгача ва мактаб таълими бошқармаси матбуот хизмати хабар берди.
Маълум қилинишича, ҳолат Олмалиқ шаҳрида жойлашган ихтисослаштирилган Бухоро мактабида содир бўлган. Айни пайтда вилоят Мактабгача ва мактаб таълими бошқармаси ҳамда Олмалиқ шаҳар бўлимида фаолият юритувчи масъуллардан иборат ишчи гуруҳ ҳолатни ўрганмоқда.
Ўрганишлар якунида батафсил маълумот берилиши таъкидланди.
Бундан аввал Тошкент шаҳрида битта кафеда овқатланган 23 киши заҳарланиб, шифохонага ётқизилган эди.
Овқатдан заҳарланиш ҳолатларидан жабрланганлар
Ўзбекистонда 2024 йилнинг 1-чорагида 18 та овқатдан заҳарланиш ҳолатлари қайд этилган бўлиб, бунда 143 нафар фуқаролар жабрланган.
ЖССТ маълумотларига кўра, дунёда ҳар йили хавфли озиқ-овқат маҳсулотларини истеъмол қилиш натижасида 600 миллионга яқин инсон жабрланади. 420 минг киши микроорганизмлар ёки кимёвий моддалар билан ифлосланган озиқ-овқатларни истеъмол қилиш натижасида вафот этади. Уларнинг 125 минг нафарини 5 ёшгача бўлган болалар ташкил этади.
Озиқ-овқат хавфсизлиги ишлаб чиқаришдан тортиб, йиғиб олиш, қайта ишлаш, сақлаш, тарқатиш, тайёрлаш ҳамда истеъмол қилишгача бўлган барча босқичларда муҳим рол ўйнайди. Ишлаб чиқариш занжирининг барча босқичида озиқ-овқат маҳсулотларининг ифлосланиши ёки зарарланиши хавфи мавжуд бўлиб, уларнинг хавфсизлиги учун ҳар бир иштирокчи – тадбиркор жавобгар.
Изоҳ (0)