Ўзбекистонда ҳозирги 6 та вазирликда тарқоқ бўлган ижтимоий хизматлар бирлаштирилиб, Ижтимоий ҳимоя миллий агентлиги ташкил этилади. Бу ҳақда ЎзЛиДеПдан Ўзбекистон президентлигига номзод Шавкат Мирзиёев ўз сайловолди дастурида маълум қилди.
Агентлик ўзида ҳозирги 6 та вазирлик (Камбағаллик, соғлиқни сақлаш, мактаб таълими, молия, ички ишлар, олий таълим)да тарқоқ бўлган ижтимоий хизматларни бирлаштиради. Янги агентлик учун камида 10 фоиз ходимлар ногиронлиги бўлган шахслар орасида танлов асосида ишга олинади.
Қайд этилишича, сўнгги олти йилда ижтимоий ёрдам кўламини 5 баробар ошириб, 2 миллиондан ортиқ оилани қамраб олган. Ҳозирги кунда ҳар бир эҳтиёжманд оила бюджет ва “3 та дафтар” тизими орқали моддий ёрдам олмоқда.
Бу мақсадларга бюджетдан ҳар йили ажратиладиган маблағни 18 триллион сўмга етказилган. Қиёслаш учун: 2016 йилда бу рақам 2,2 триллион сўмни ташкил этарди. Ижтимоий таъминотга йўналтирилган маблағларнинг ялпи ички маҳсулотдаги улуши 2,5 баробар кўпайди (2016 йилдаги 0,9 фоиздан 2022 йилда 2,2 фоизга).
“Лекин ижтимоий ҳимоя фақат пул бериш билан чекланиб қолмоқда. Аслида, бу тизимнинг вазифаси аҳолини оғир аҳволдан чиқариш ва жамиятда ўз ўрнини эгаллаши учун кўмак беришдан иборат бўлиши керак. Мисол учун, бизда оғир вазиятга тушган 30 та тоифадаги 9 миллион аҳоли бор. Булар — ногиронлиги бор шахслар, ёлғиз кексалар, боқувчисини йўқотганлар, оилада зўравонликка учраган аёллар. Шу боис, ижтимоий хизматлар соҳасини буткул қайта кўриб чиқамиз”, — дейди Шавкат Мирзиёев.
Қайд этилишича, энди ҳар бир маҳаллада профессионал ижтимоий ходимлар фаолияти йўлга қўйилади ва улар ижтимоий хизматларни манзилли асосда кўрсатади. Оғир ҳаётий аҳволга тушган ёки тушиш хавфи юқори бўлган ҳар бир оила бўйича алоҳида “ижтимоий хизмат иши” очилади.
Ушбу оилаларда шароитни яхшилаш, уларга даволаш, дориларни етказиш, фарзандларини боғча ва мактабга жойлаштириш, моддий ёрдам бериш каби ижтимоий хизматлар кўрсатилади. Оғирроқ вазиятдаги оилаларга психологик ёрдам ҳам берилади. Бундай оилаларнинг ҳаёт сифати амалда яхши томонга ўзгаргандан кейингина, “ижтимоий хизмат иши” ёпилади.
Изоҳ (0)