АҚШнинг Флорида штатида 25 йил олдин содир этган жинояти сабабли 48 ёшли эркакка нисбатан ўлим жазоси ижро этилди. Бу ҳақда UPI хабар берди.
Майкл Танзи исмли шахсга қарши ҳукм 9 апрель куни ижро этилган. У Раифорд шаҳрида жойлашган Флорида штат қамоқхонасида ўлдирилган. Ижро этиш усули кўрсатилмаган. Бироқ Флоридада ўлимга олиб келадиган инексия ёки электр стул қўлланилади.
Марҳум қандай жиноят содир этганди?
Қотиллик 2000 йилда юз берган, Майкл Танзи исмли эркак аёлни ўғирлаб кетган ва ўлдирган. Суд ҳужжатларига кўра, Акоста исмли аёл 2000 йил 25 апрелда ҳужумга учраган. У Майамидаги боғда парковка қилинган фургонида китоб ўқиб ўтирган. Шу пайт Танзи ундан сигарет сўраган ва аёлнинг юзига зарба бериб, машинаси билан бирга уни ўғирлаб кетган.
Танзи аёлнинг бўйнига лезва тираб, уни ўзи яшайдиган Флорида Кейс томон олиб кетган. Йўл давомида у Акостани арқон билан боғлаб, оғзига сочиқ тиққан, жинсий тажовуз қилган ва Акостанинг банк картасидан пул ечиб олиш учун фойдаланган. Шундан сўнг эркак аёлни бўғиб ўлдириб, унинг жасадини ўрмонли ҳудудга ташлаб кетган.
Акостанинг ҳамкасблари ва дўстлари унинг йўқолгани ҳақида полицияга хабар берган. Ҳодисадан икки кун ўтгач Танзи аёлнинг фургонини ҳайдаб кетаётганида ҳибсга олинган. Унинг ёнидан Акостанинг банк ҳисобидан пул ечилганига оид квитансиялар топилган. У жиноятни тан олган ва полицияга Акостанинг жасадини қаерга ташлаганини ҳамда жиноят пайтида ишлатган скотч ва арқонни қаерга улоқтирганини кўрсатган.
Танзи 2003 йил 11 апрелда биринчи даражали қотиллик, ўқотар ёки ўлимга олиб келувчи қурол билан автомобилни ўғирлаш, одам ўғирлаш ва қуролли талончилик айбловлари билан ўлим жазосига ҳукм қилинган. Ўлим жазосига ҳукм қилинган маҳбус барча шикоят қилиш имкониятларини ишлатиб бўлган.
Маҳаллий “Ўлим жазосига муқобил чоралар” ташкилотига кўра, Танзи болалигида жинсий ва жисмоний зўравонликка дучор бўлган. Оқибатда у ёш вояга етган пайтида ўз жонига қасд қилишга уринган. Уч йил ўтиб, у Акостани ўлдирган.
Танзи 2025 йил Флоридада қатл этилган учинчи шахсдир. Бу йили Қўшма Штатларда жами 11 та қатл амалга оширилди.
Изоҳ (0)