Қирғизистон президенти Садир Жапаров рафиқаси ҳамроҳлигида 18 июль куни давлат ташрифи билан Ўзбекистонга келди. Бу ҳақда Президент матбуот хизмати хабар берди.
Тошкент халқаро аэропортида олий мартабали меҳмонни Шавкат Мирзиёев ва Зироат Мирзиёева кутиб олди.
Олий мартабали меҳмон шарафига икки мамлакат давлат байроқлари кўтарилиб, фахрий қоровул саф тортди.
Ташриф дастурига мувофиқ, олий даражадаги музокаралар бўлиб ўтади, уларда Ўзбекистон билан Қирғизистон ўртасидаги кенг қамровли стратегик шериклик муносабатларини янада мустаҳкамлаш масалалари муҳокама қилинади.
Ўзаро савдо ҳажмини ошириш, бизнес ва ҳудудлар даражасида кооперация алоқаларини кучайтириш, иқтисодиётнинг устувор тармоқларида қўшма лойиҳаларни илгари суриш, транспорт-транзит соҳасидаги имкониятлардан фойдаланиш, маданий-гуманитар алмашинувни фаоллаштиришга алоҳида эътибор қаратилади.
Давлат раҳбарлари халқаро ва минтақавий сиёсатнинг долзарб жиҳатлари юзасидан ҳам фикр алмашадилар, кўп томонлама тузилмалар доирасидаги ҳамкорлик масалаларини муҳокама қилади. Бир қатор қўшма лойиҳаларни ишга тушириш ва икки томонлама ҳужжатлар тўпламини имзолаш кўзда тутилган.
-s66_ypD4.jpg)
Қирғизистон президенти Садир Жапаров Ўзбекистонга сўнгги марта 2023 йилнинг ноябрида, Иқтисодий ҳамкорлик ташкилотининг 16-саммитида иштирок этиш учун келганди. Давлат ташрифи билан эса 2021 йилнинг март ойида келганди.
Изоҳ (0)