Ўзбекистон, Қозоғистон ва Қирғизистон энергетика ҳамда сув хўжаликлари вазирлари 14 май куни Тоскентда навбатдаги учрашувини ўтказди.
Энергетика вазирлиги мабуот хизматининг хабар қилишича, унда мамлакатлар сув-энергетика тизимининг ёз мавсумида ҳам барқарор ишлашини таъминлаш масалалари муҳокама қилинди. Шунингдек, тармоқлар иш режимларининг графиклари келишилди.
Мазкур тадбирда томонлар ўртасида ҳамкорликда амалга оширилаётган лойиҳалар, хусусан, “Қамбарота ГЭС-1” қурилиши лойиҳасининг ҳозирги ҳолати ва сув-энергетика балансини мувофиқлаштириш масалалари ҳам кўриб чиқилди.
Учрашув якунлари бўйича тегишли баённома имзоланди ҳамда яқин кунларда келгуси тадбирларни мувофиқлаштирилган тарзда ўтказиш юзасидан келишувга эришилди.
“Ҳар бир вегетация мавсуми олдидан бундай муҳокама ўтказиш ва иш режимларини келишиш айни пайтдаги гидрологик вазиятни ҳамда мамлакатларнинг сув-энергетика ресурсларига бўлган эҳтиёжларини инобатга олиш имконини беради”, деган учрашувда Қозоғистон энергетика вазири Эрлан Аккенженов.
Қозоғистон Энергетика вазирлиги матбуот хизматининг хабар қилишича, энергетика объектларининг келишилган иш режимлари ва Сирдарё ҳавзасида келгуси вегетация даври учун сув ажратиш тартибини белгиловчи баённома имзоланиши Марказий Осиёда сув ресурсларидан мувозанатли фойдаланиш ва энергия тизимларининг барқарор ишлашини таъминлашга қаратилган уч давлатнинг мунтазам ҳамкорлиги доирасидаги муҳим қадамдир.
Изоҳ (0)