Наманган вилояти ҳокими Шавкат Абдураззоқов синфдошлари ҳамроҳлигида ўзи таҳсил олган Наманган шаҳридаги 2-умумтаълим мактабида ўтказилган “Сўнгги қўнғироқ” тадбирида иштирок этди. Бу ҳақда “Дарё” мухбири хабар берди.
Вилоят раҳбари мактаб битирувчиларига президент табригини ўқиб эшиттирди. Ўқиш давомида муваффақиятларга эришган ўқувчилар ва уларнинг ота-оналарига ташаккурнома ҳамда эсдалик совғалари топширди. Битирувчиларга китоблар тўпламлари тақдим этилди.
“Дарё” мухбири Азизбек Абдувалиев тадбир давомида Наманган вилояти ҳокимидан интервью олди.
“Ўқишни тамомлаганимизга бугун роппа-роса 30 йил тўлди. У пайтлар вилоятда бор-йўғи 3 та олий таълим муассасаси бор эди, шу сабабли битирувчиларнинг ўқишга кириш имконияти ҳам паст бўлган. Бугунги кунга келиб уларнинг сони 10 тага етди, шунга яраша институт ва университетларда ўқиётган ёшларимиз қамрови ҳам кенгайди”, — дейди Шавкат Абдураззоқов.
Ҳокимнинг айтишича, вақт тиғизлиги сабабли синфдошлар гап-гаштагига боришга фурсат тополмайди, лекин уларнинг иссиқ-совуқ маъракаларидан қолмасликка ҳаракат қилади.
“Битирувчиларга айтиладиган гап шуки, улар ўзининг устида ишлаши ва қийинчиликлардан қўрқмаслиги зарур. Асосийси, ота-онанинг ҳурматини жойига қўйиш керак. Шунда ҳаммаси яхши бўлади”, — дейди Шавкат Абдураззоқов.
“Сўнгги қўнғироқ” тадбири якунига етганидан сўнг Наманган вилояти ҳокими хизмат машинасига таълим берган устозларини ўтқазди, ўзи эса синфдошлари билан микроавтобусда кейинги манзилга йўл олди.
Изоҳ (0)