Тошкент шаҳрининг Шота Руставели кўчасида автобуслар тезкор ҳаракатланиши учун BRT йўлаги қурилади. Бу ҳақда блогер Никита Макаренко хабар берди.
Объект паспорти Шота Руставели кўчасида ўрнатилган. Унга кўра, автобус йўлаги йўлнинг чеккасида эмас, балки илгариги трамвай излари каби йўл ўртасидан ўтади. Бекатлар йўловчилар автобусга тушиб-чиқиши учун қулай ва хавфсиз қилиб барпо этилади.
Лойиҳа Tashkent Invest ва Хитойнинг China State Construction компанияси томонидан амалга оширилади. Бироқ лойиҳа борасида ҳеч қандай жамоатчилик муҳокамаси ўтказилмаган. Шу сабабли фаоллар шаҳар ҳаётига дахлдор лойиҳалар очиқланиши, жамоатчилик муҳокамасига қўйилишини сўрамоқда.
“Қарор мутлақо тўғри. Муҳими уни амалга оширишда хато қилмаслик керак. Аслида, бундай жамоатчилик учун муҳим бўлган лойиҳа муҳокамага қўйилиши, мутахассисларга кўрсатилиши, намойиш этилиши керак”, дейди Никита Макаренко.
“Ҳалиям кеч эмас. Шаҳарнинг ҳаётига дахлдор лойиҳалар очиқланиши, жамоатчилик муҳокамасига қўйилиши, ўзимизнинг экспертлар ҳамжамияти билан бамаслаҳат иш тутилиши керак”, деб ёзди Telegramъдаги “Давлетов.уз” канали муаллифи Қобил Ҳидиров.
2024 йил ноябрида Тошкент ҳокимлиги ва Хитойнинг China State Construction компанияси деярли 1 миллиард долларлик лойиҳалар бўйича келишиб олганди. Унинг қарийб 300 млн долларлик лойиҳаси доирасида пойтахт йўл инфратузилмаси яхшиланиши керак, яна 259 млн доллар эса тирбандликнинг олдини олиш учун замонавий кўприклар қурилиши лозим.
Транспорт вазири Илҳом Маҳкамов жорий автобус йўлаклари йўл ҳаракати мунтазамлиги муаммосини ҳал қилиш учун “тезкор ечим”лигини, тўлиқ BRT автобус тизими ҳақида гапирилса, ажратилган йўлакдан, бунинг учун махсус йўлакдан ташқари, махсус тўхташ жойлари ва пиёдалар ўтиш жойлари керак бўлишини айтганди.
Урганч шаҳрида шундай алоҳида йўлакда ҳаракатланувчи тезюрар автобуслар йўлга қўйилиши режалаштирилганди.
Тошкент шаҳрига трамвай ҳаракати қайтарилиши ҳам мумкин. Президент фуқаролардан бу борада кўплаб хатлар ва мурожаатлар келаётганини айтганди.
Изоҳ (0)