Ерга 53 йил олдин “Венера-8” миссияси доирасида учирилган “Космос-482” сайёралараро космик аппарат қулаши мумкин. Унинг геолокацияси Осиё ёки Марказий Осиё давлатлари ҳудудига тўғри келиши тахмин қилинмоқда. “Ўзбеккосмос” эксперти вазиятга ойдинлик киритди.
Маълум қилинишича, ҳақиқатан 1972 йил 31 март санасида собиқ Совет Иттифоқининг “Венера” дастури бўйича “Космос-482” сайёралараро космик аппарати фазога учирилган. Аммо ракета-ташувчининг якуний босқичи муваффақиятсиз ишлаши оқибатида у Ер орбитасида қолиб кетган.
Аппаратнинг ерга қулаши 9—11 май кунларига тўғри келиши мумкин.
Агентлик “Космос-482”нинг аниқ қаерга қулашини аниқлаш бир оз мушкул эканини маълум қилди. Унинг Ўзбекистон ҳудудига тушиш эҳтимоли эса 0,3-0,5 фоиз оралиғида баҳоланмоқда.
Аппаратнинг катта қисми атмосферага кириши билан ёниб кетса-да, Венеранинг оғир шароитларида қўниш ва ишлаш учун мўлжалланган ярим тоннага (500 кг) яқин массали титан шари алоҳида хавф туғдиради. Бу компонент Ер атмосферасига киришда омон қолади ва бутунлай қулаб тушади. Парашют борлигига қарамай, коинотда 53 йил бўлганидан кейин у ишламаслиги мумкин. Ерга урилиш тезлиги эса соатига 500 км гача етиши кутилмоқда.
Космик кеманинг бўлаклари топилган тақдирда, бу ҳақда зудлик билан расмийларга хабар бериш ва ҳеч қандай ҳолатда аппарат қолдиқлари билан алоқада бўлмаслик тавсия этилди. Улар таркибида хавфли кимёвий моддалар бўлиши мумкин.
Собиқ Тошкент машинасозлик конструкторлик бюроси мазкур “Венера” дастурининг сўнгги босқичларида муносиб иштирок этган. У “Венера-13 ва 14” (1982) ва “Вега-1 ва 2” (1985) аппаратлари учун грунт олиш ва бурғилаш қурилмаларини лойиҳалаштирган ва ишлаб чиқарган. Уларни синовдан ўтказиш эса Тошкент вилоятидаги Невич қишлоғида жойлашган синов марказида амалга оширилган.
Изоҳ (0)