Косово Республикасида бўлиб ўтган ЭGMO-2025 — Европа Қизлар Математика Олимпиадасида Ўзбекистон тарихий ютуқни қўлга киритди: мамлакатимиздан илк бор иштирок этган 4 нафар иқтидорли қизлардан 3 нафари медал билан юртимизга қайтмоқда.
Жами 55 давлатдан 300 га яқин иқтидорли қизлар иштирок этган ушбу нуфузли олимпиадада Ўзбекистон вакиллари сўнгги йиллардаги илмий ривожланишнинг, хусусан, қизлар учун яратилаётган имкониятларнинг амалдаги натижасини намоён қилишди.
Ғолибларимиз:
Дилдора Маҳкамова — Тошкент шаҳри Олмазор туманидаги ихтисослаштирилган мактабнинг 8-синф ўқувчиси — Кумуш медал.
Малика Хожамуратова — Нукус шаҳридаги 1-сонли ихтисослаштирилган мактабнинг 9-синф ўқувчиси — Бронза медал.
Настарин Камолова — Бухоро вилояти Қоракўл тумани ихтисослаштирилган мактаб-интернати 9-синф ўқувчиси — Бронза медал.
Юрт қизларининг зафарли қадами нафақат шахсий муваффақият, балки бутун бир авлод учун ифтихор ва илҳом манбаидир. Олимпиадада қатнашишнинг ўзи катта тажриба саналса, унда совриндор бўлиш — илм йўлидаги қатъият ва маҳорат исботидир.
Мамлакатимизда охирги йилларда таълим соҳасидаги ислоҳотлар, айниқса, аёл-қизларнинг илм-фанга кенг жалб этилишига қаратилган ташаббуслар ўз мевасини бермоқда. Президент Шавкат Мирзиёев ташаббуси билан жорий қилинган махсус дастурлар, STEM соҳасида қизлар учун очилган янги имкониятлар ва халқаро олимпиадаларга тайёрлов марказлари бугунги натижанинг асосий омилларидандир.
Бу ютуқ — Ўзбекистоннинг халқаро фан майдонидаги навбатдаги муваффақиятли қадами бўлиб қолади.
Изоҳ (0)