Turkiyaning STM mudofaa kompaniyasi Malayziya qirollik dengiz kuchlari uchun ADA sinfiga mansub uchta korvet qurilishiga start berdi. Istanbulda bo‘lib o‘tgan tantanali marosim bilan ushbu loyihaning ilk bosqichi — korpus ostini qo‘yish boshlandi. Kemalar Malayziya bilan imzolangan LMS (Littoral Mission Ship) Batch-2 dasturi doirasida barpo etilmoqda.
Malayziya turk korvetlarining Osiyo-Tinch okeani mintaqasidagi ilk mijozi bo‘ldi. Ular mamlakatga o‘z manfaatlarini himoya qilish, dengizdan keladigan xavflarga qarshi turish, havo hujumidan mudofaa, elektron urush va asimmetrik tahdidlarga qarshi kurash imkoniyatlarini beradi. Kemalar 2027-yil oxiriga qadar yetkazib berilishi rejalashtirilgan.
STM kompaniyasi korvetlarning dizayni, qurilishi, barcha tizimlar integratsiyasi va logistikasiga javobgar bo‘lib, loyihaga Turkiyaning boshqa harbiy sanoat korxonalari ham jalb qilingan. Har bir kema 99,5 metr uzunlikka ega bo‘lib, 26 tugundan (48,15 km/soat) ortiq tezlikda harakatlana oladi. Qolaversa, ular 4 000 dengiz milidan (7408 kilometr) ortiq masofani bosib o‘tishga qodir. Korvetlarda 111 nafar ekipaj bo‘ladi, shuningdek, vertolyotlar uchun angar va yonilg‘i quyish tizimi ham ko‘zda tutilgan.
Gap qurollanish haqida ketsa, kemalarda Italiyada ishlab chiqilgan 76 mm kalibrli Leonardo 76 mm asosiy to‘pi, mahalliy Aselsan kompaniyasining Smash 30 mm avtomatik quroli, Roketsan’ning Atmaca (yer-yer) raketalari va Janubiy Koreyaga tegishli Haegung (yer-havo) tizimlari o‘rnatiladi. Shuningdek, ularni zamonaviy elektron urush vositalari, radarlar va Havelsan kompaniyasining jangovar boshqaruv tizimi bilan jihozlash ko‘zda tutilgan.
LMS Batch-2 dasturi Turkiya va Malayziya hukumatlari o‘rtasida 2024-yil iyun oyida imzolangan hamkorlik bitimidan so‘ng boshlandi. Kema korpuslari uchun po‘lat kesish ishlariga o‘tgan yilning dekabr oyida start berilgan.
Izoh (0)