“Arzanda jonim” qo‘shig‘i bilan muxlislar eʼtiboriga tushgan xonanda Surayyo Qosimova turmush o‘rtog‘i Husan Qosimov bilan “Ikkalamiz” loyihasiga bergan intervyusida to‘ydan avval qiyin vaziyatga tushishgani va bir necha bor ajrashishga qaror qilishgani haqida gapirishdi.
— Oila qurganimizga 17 yil bo‘ldi. Inson ichidan o‘tganini o‘zi biladi. Ko‘p davralarda oila qurganimizga shuncha yil bo‘ldi, desak, nahotki, deb hayratlanishadi. Hazillashib, ikkimizning ichimiz tugab bo‘lgan, deyman. Chunki o‘tgan vaqt mobaynida ko‘p marta sinaldik.
Turmush o‘rtog‘im bilan oila qurishim juda qiziq kechgan. U kishi Farg‘onadagi sanʼat bilim yurtida o‘qirdi, men esa Toshkentda o‘qib, u yerga tez-tez borib turardim. Shu orqali meni taniganlar, ammo Toshkentga kelib, O‘zbekiston davlat Konservatoriyasiga o‘qishga kirganidan keyin tanishganmiz. Biz shunchaki do‘st edik, hatto unga sensirab gapirardim. Do‘stlarimning aksariyati o‘g‘il bolalar bo‘lgani uchun Husan aka bilan ham shunday munosabatda bo‘laman derdim, deydi Surayyo Qosimova.
Husan Qosimov esa to‘ydan avval ayoli bilan birga ishlagani va ularning oila qurishiga ko‘pchilik qarshi bo‘lgani haqida gapirdi.
-XByToK_U.png)
— To‘ydan avval ayolimning cholg‘uchisi bo‘lganman, to‘y xizmatlariga birga borardik. Keyinchalik bir-birimizga nisbatan iliqlik paydo bo‘ldi. Ammo u baʼzi uchinchi shaxs insonlarga yoqmadi. Surayyo yaxshi prodyuser bilan ishlardi, “Husan bilan oila qursa, shuncha tikkan puling nima bo‘ladi? U hammasini tashlab ketadi”, deb u kishini fikridan qaytarishdi. Katta pul ikkimizning bo‘ynimizda qoldi. U ham, men ham oddiy talabamiz, to‘ylardan topadigan pulimizdan boshqa daromad manbayimiz yo‘q edi. Telefonimiz jiringlasa, yuragimiz dupillardi, qo‘rqardik. Vaziyat shu darajaga yetib bordiki, studiyalarda uxlab qolishimizga to‘g‘ri keldi. Bir-ikki soat bo‘lsa-da, to‘rtta stulni birlashtirib, uxlab olardik. Eng yomoni, o‘sha vaqtda bizni eng yaqin do‘stlarimiz, hamkorlarimiz yolg‘izlatib qo‘yishdi. Qarzdan qutilgach, onamga Surayyo haqida aytdim. Qarshi bo‘ldilar: u xonanda, keyin ko‘zi ojiz ekan, dedilar. Xullas, oilamiz to‘ydan avval ham ko‘p sinovlarni yengib o‘tdi, deydi Husan Qosimov.
Husan Qosimov ayoli bilan oila qurishga jiddiy qaror qilishdan avval nimalar haqida o‘ylagani haqida ham to‘xtalib o‘tdi.
— Oilada hech bir narsa bir tekis bo‘lmaydi. Qiyinchilik, yetishmovchiliklar, sinovlar bo‘lishi tabiiy. Biz oila qurmasdan avval bir-birimizni tushunib, qiyin vaziyatdan chiqoldikmi, demak, oilaviy hayotda ham qiynalmaymiz, deb o‘ylaganman. Hozir ko‘p oilalar kichik qiyinchilikka ham chidolmay ajrashib ketyapti. Eri qamalib qolsa, ayoli ajrashib, boshqa bilan oila quradi. Yoki ayol betob bo‘lib qolsa, uni ota-onasining uyiga ketkazib, boshqasiga uylanadi. Oilada er-xotinning do‘st va sabrli bo‘lishi muhim ahamiyatga ega. Onam ham, Surayyoning yaqinlari ham oila qurishimizga qarshi bo‘lishgandi. Ammo hozir hammasi joyida, deydi Husan Qosimov.
Surayyo Qosimova to‘y kunini Ozodbek Nazarbekov belgilab bergani haqida gapirdi.
— Ozodbek Nazarbekov “To‘yingda bosh bo‘laman”, deganida rosa xursand bo‘lganman. Buning uchun hamisha minnatdorman. To‘y o‘tganidan keyin Sobirjon Mo‘minov “Nega bizni ham aytmadingiz?” deganlar. Haqiqatan ham to‘yga ko‘p sanʼatkorlarni aytmagandik. Chunki Toshkentdan vodiyga borish osonmas, uning ustiga to‘y xizmatlari bo‘ladi, hijolat bo‘lishmasin, degandik. O‘shanda Sobirjon Mo‘minov “Ozodbek viloyat hokimligining eng yaxshi ziyofatini tashlab, bugun singlimning to‘yi, deb ketdi”, deganida rosa xursand bo‘lgandim, deydi Surayyo Qosimova.
Xonanda turmush o‘rtog‘iga ko‘p marta ajrashish taklifini bergani haqida gapirdi.
— Ko‘p marta ajrashish taklifini berganman. “Do‘st bo‘lib qolamiz”, deb qo‘shimcha ham qilib qo‘yaman. Chunki ayollar baribir emotsiyaga beriladi. Turmush o‘rtog‘im ham sabrli, ko‘nglimni oladi. Shu bilan hammasi unutiladi, deydi Surayyo Qosimova.
Izoh (0)