Italiyalik mashhur kimyogar, Nutella retsepti muallifi Franchesko Rivella 97 yoshida vafot etdi. U dunyoga mashhur Ferrero pastasini yaratish ustida ishlagani uchun “Nutella otasi” deb atalgan. Bu haqda Messaggero xabar berdi.
Kimyogar 1952-yilda 25 yoshida Ferrero kompaniyasiga ishga kirgan va turli mahsulotlar tayyorlashda qo‘llaniladigan xom ashyoni o‘rganishni boshlagan. O‘sha paytda qandolatchilik brendi atigi olti yildan beri mavjud bo‘lib, Italiyaning shimolida joylashgan kichik Alba shahrida faoliyat yuritayotgandi.
Rivella Mikele Ferreroning o‘ng qo‘liga aylandi: u Milanda maxsus tashkil etilgan laboratoriyada Mikele amakisi Jovanni bilan birga sotib olgan xomashyoni, shuningdek, Yevropaning yarmi bo‘ylab raqobatchilarning mahsulotlarini tahlil qilar edi, deyiladi xabarda.
Franchesko Rivella texnik menejer, keyinchalik fundamental tadqiqotlar bo‘yicha direktor va 1993-yilda nafaqaga chiqqunga qadar Ferreroda faoliyat yuritgan. Nutelladan tashqari, u Ferreroning boshqa mashhur mahsulotlari — Mon Cheri konfetlari, Tic Tac drajesi, Kinder Chocolate, Kinder Surprise va Ferrero Rocher retseptlarini ishlab chiqishga katta hissa qo‘shgan.
Bugungi kunda Ferrero guruhida 47 mingdan ortiq kishi ishlaydi va uning brendlari 170 dan ortiq mamlakatlarda sotiladi. Brend hali ham Ferreroning uchinchi avlodi tomonidan boshqariladigan oilaviy korxona bo‘lib qolmoqda.
Nutella shakar, funduk, kakao va sutni o‘z ichiga olgan yettita tarkibiy qismdan iborat. Bundan tashqari, pasta tarkibida palma yog‘i mavjud, shuning uchun ekofaollar ko‘pincha Ferreroni o‘rmonlarni kesishda ayblaydi, ammo kompaniya faqat “barqaror 100% RSPO sertifikatiga ega” palma yog‘idan foydalanishini ta’kidlaydi.
Nutella haqida qiziqarli faktlar
- Nutellaning ilk versiyasi Ikkinchi jahon urushidan so‘ng yaratilgan.
- Nutella tayyorlash uchun juda ko‘p miqdorda funduk kerak bo‘ladi. Bir bankada 50 ga yaqin yong‘oq ishlatiladi.
- Xalqaro Nutella kuni 2007-yilda bir bloger tomonidan joriy etilgan.
- 1960-yillarda Italiyada Nutella’ning mashhurligi eng yuqori cho‘qqiga chiqdi. Agar bola bozorga bir burda non bilan borsa, peshtaxtalarda ishlaydigan odamlar bolaga uning ustidan yupqa qilib pasta surtib bergan.
- 2017-yilda Germaniyada o‘g‘rilar 20 tonna Nutella’ni o‘g‘irlashga muvaffaq bo‘ldi va u saqlangan muzlatgichli treylerni olib ketishdi. Odamlar Nutella’ni birinchi marta o‘g‘irlayotgani yo‘q, 2013-yilda shunga o‘xshash holatda besh tonna o‘g‘irlangan.
Izoh (0)