“The cover up” лойиҳасидаги иштироки билан мухлислар эътиборига тушган хонанда Афруза бугунги кунда ўз йўналишига эга ижодкор. Ёш хонанда эндигина 28 ёшни қаршилади, аммо уни кузатувчилар ва қўшиқларини севиб тингловчилар оз эмас.
Афруза тахаллуси билан ижод қиладиган хонанданинг асли исм-шарифи Дилафрўз Рустамова бўлиб, у 1996 йил Фарғона шаҳрида таваллуд топган. У Ўзбекистон давлат консерваториясининг Эстрада хонандалиги факультетини тамомлаган.
“Қизлар билан келишолмасдим”
— Оилада иккита фарзандмиз, акам билан ўртамизда бор-йўғи икки ёш фарқ бор. Шу боис акам билан бирга ўйнаб улғайганмиз. Унга қўшилиб ўғил болалар билан кўп ўйнаганим учунми, қизлар билан унчалик келишолмасдим. Ўйлаб қарасам, болалигимда анчайин шўх-шаддод қиз бўлганман.
Мактабда эса аълочи ва тартибли ўқувчи эдим. Чунки оиламизда тартибга жиддий эътибор беришарди. Онам кечқурун тўйдан нечада қайтишларидан қатъи назар, уйда ҳамма нарса жойида бўлишини талаб қиларди. Агар ҳаммаси кўнгилдагидек бўлмаса, тонггача бўлса-да, ишларини қилиб, кейин ухларди, дейди Афруза.
“Нега айнан Афруза?”
— Нега ота-онангизнинг фамилияси билан саҳнага чиқмагансиз, деб кўп сўрашади. Аслида, тахаллус билан ижод қилишимни отамнинг ўзи хоҳлаган. Телелойиҳада иштирок этишдан аввал тахаллус борасида роса ўйланганмиз. Ўз исмим ҳам жуда ёқади, аммо саҳнада номим жаранглаши учун у қисқа бўлиши керак эди. Шу боис Афруза тахаллусини танлаганмиз, дейди хонанда.
“Онамнинг хонанда эканини айтмадим”
— Санъат оиламизга бегона эмас. Онам хонанда, дадам эса созанда. Амаким, келинойим ҳам санъат соҳасида фаолият юритишади. Аммо санъаткорлар оиласидан эканимни сир сақлаганман. Одамлар орасида “таниш-билишчилик қилишибди” деган гап тарқалиши ва иштироким кўнгилдагидек бўлмаса, яқинларимни уялтириб қўйишдан қўрққанман. Шу боис анча вақтгача онам машҳур хонанда Шаҳло Рустамова эканлигини айтмаганман, дейди Афруза.
“Энг яхши танқидчим — дадам”
— Қўшиқларимни оилавий бирга танлаймиз, уни ижро этишдан аввал яхшилаб муҳокама қиламиз. Энг яхши танқидчим дадам бўлади. Рақсбоп бўлсин деб “Вот такая” номли қўшиқни ижро этганман. Аммо ҳалигача дадам “Шуни бекор айтгансан-да”, дейди.
Илгари асосан жаҳон эстрадаси қўшиқларини куйлардим. Ҳозир ҳам ўзим учун бундай қўшиқларни ижро этиб тураман, дейди Афруза.
“Ёрқинхўжа Умаров — менинг акам”
— Санъаткор ким биландир бирга дуэт куйласа ёки ижодий ҳамкорлик қилса, дарров улар ўртасида қандайдир муносабат бор, деб тахмин қилишади. Ёрқинхўжа Умаров билан ҳам кўп гап-сўзларга сабаб бўлганмиз. У инсонни нафақат ижодкор, балки инсон сифатида ҳам ҳурмат қиламан. “The cover up” лойиҳасида иштирок этмасдан аввал танирдим, деганди Афруза интервьюларининг бирида.
У актёрга келин бўлди!
Шу йилнинг 25 сентябрь куни пойтахтдаги тўйхоналардан бирида хонанда Афрузанинг никоҳ кечаси бўлиб ўтди. Никоҳ оқшомида ўзбек киноси ва мусиқа санъатининг кўплаб таниқли вакиллари иштирок этди. Хонанданинг турмуш ўртоғи Беҳруз Аҳмедов — Ўзбек миллий академик драма театри актёри Ботир Муҳаммаджоновнинг ўғли. У ссенарист ва мусиқий продюсер сифатида фаолият юритади. Беҳруз аввалроқ Афруза билан АҚШ сафари чоғида унинг қўлини сўраган эди.
Изоҳ (0)