“2022 йилда уй-жой нархлари иккиламчи бозорда 28 фоизга, аҳоли реал даромади эса 9 фоизга ошди” – Марказий банк раиси

Ўзбекистонда 2022 йилда уй-жой нархлари аҳоли даромадидан бир неча баробар юқори даражада ўсган. Бу ҳақда Марказий банк раиси Мамаризо Нурмуродов 26 январь куни бўлиб ўтган матбуот анжуманида маълум қилди, дея хабар берди “Дарё” мухбири. 

Мамаризо Нурмуродовнинг айтишича, уй-жойлар нархлари кўтарилишига бир неча омиллар таъсир ўтказган.

“2022 йилда меҳнат бозоридаги барқарорлик сақлаб қолиниши, аҳоли даромадининг номинал даражада 21 фоиз, реал даражада 9 фоизга ўсиши, трасчегаравий пул ўтказмаларининг юқори ўсиш суръатлари узоқ муддат фойдаланиладиган товарлар ва кўчмас мулкларга бўлган талабнинг ортишига олиб келди. Бу ўз навбатида мазкур бозорларда нархларнинг ўсишига маълум жиҳатдан таъсир қилди. Кузатувларимизга кўра, 2022 йилда иккиламчи уй-жой бозоридаги нархлар 28 фоиз атрофида, бирламчи бозорда 17 фоиз атрофида ўсди”, – деди Марказий банк раиси.

Аввалроқ Мамаризо Нурмуродов 2023 йилда кутилаётган асосий инфляцион хатарларни санаб берганди. Хусусан, аҳоли ва тадбиркорлик субекатларининг инфляцион кутилмалари ошиб бораётгани, базавий инфляция даражасининг юқори кўрсаткичларда шаклланаётгани, бюджет тақчиллигининг 4 фоиз даражасида шаклланиши инфляцион хатарларни келтириб чиқариши айтилган.

“Шунингдек, таклиф билан боғлиқ инфляцион хатарлар ҳам бор. Бунга тўхталадиган бўлсак, метан гази узиб қўйилди. Бу ўз-ўзидан бензин тақчиллигини юзага келтирди. Биз нима хатарни кутяпмиз, деганда, Марказий банк эртага газ заправкалари очиладиган бўлса, газ нархининг кўтарилиб кетиши мумкин. Аномал совуқ келгуси йилда кутилаётган ҳосилдорликка салбий таъсир қилиш эҳтимоли бор. Бу ҳолат нархларга оширувчи босим кўрсатади. Яна битта масала, бизнинг истеъмолимизда бўлган айрим товарлар устувор равишда импорт билан боғлиқ. Ўшаларни бизга етказувчи асосий савдо ҳамкорларимиз экспортига маълум чекловлар киритилиши ҳам инфляцияга таъсир қилади.

Кейинги хатар қурилиш материаллари нархларига бориб тақалади. Ҳозирги табиий газ узилишлари қурилиш материаллари таклифида танқислик келтириб чиқариб, келгусида бу маҳсулотлар нархлари ошишига олиб келиши мумкин. Пул ўтказмалари ҳажмининг ўсиши ҳам инфляцияга босим ўтказувчи хатар ҳисобланади”, — деган Марказий банк раҳбари.