O‘zbekiston Markaziy banki joriy yil yanvar–oktyabr oylaridagi transchegaraviy pul o‘tkazmalari to‘g‘risida maʼlumot berdi.
Qayd etilishicha, 10 oy mobaynida xorijdan O‘zbekistonga kelib tushgan pul o‘tkazmalari 12,6 milliard dollarni tashkil etgan. Bu raqam 2023-yil mos davriga nisbatan 34 foizga ko‘p.
Mablag‘larning 78 foizi Rossiyadan (9,8 milliard dollar) kelib tushgan bo‘lib, o‘tgan yil mos davridagidan 35 foizga oshgan. Transfertlarning qolgan qismi Qozog‘iston (699 million dollar), AQSH (470 million dollar), Janubiy Koreya (458 million dollar), Turkiya (331 million dollar), Buyuk Britaniya (109 million dollar) va boshqa mamlakatlardan o‘tkazilgan, deyiladi regulyator sharhida.
Markaziy bank o‘z tahlilida xalqaro pul o‘tkazmalari hajmi o‘sishiga qator omillar taʼsir ko‘rsatganini keltirgan. Xususan, migrantlarni ishga qabul qiluvchi asosiy hamkor davlatlarda iqtisodiy faollik kuzatilishi, ish haqi ko‘tarilgani hamda rivojlangan mamlakatlarga mehnat migratsiyasi oqimi ortgan. Masalan, Rossiyada mehnat muhojirlari faoliyat yuritadigan sohalarda taklif qilinayotgan ish haqi miqdori o‘rtacha 38 foizga o‘sgan. Qurilish sohasida ish haqlari 55 foiz, yetkazib berishda 48 foiz, taksi va restoran xizmatlarida 46 foiz hamda yuk tashish sohasida 14 foizgacha ko‘tarilgan.
10 oy davomida 113 ming nafardan ziyod o‘zbekistonliklar rivojlangan mamlakatlarga rasmiy ishlash uchun yuborilgan (2023-yil mos davridagidan 3,6 barobar ko‘p).
O‘tgan yil shu davridagiga qaraganda AQSHdan O‘zbekistonga pul o‘tkazmalari 37 foizga oshgan. O‘z navbatida Janubiy Koreyadan 71 foizga, Buyuk Britaniyadan 76 foizga, Yevropadan 41 foizga o‘sish kuzatilgan.
“10 oy ichida jismoniy shaxslarga kelib tushgan mablag‘larning 7 milliard dollari anʼanaviy xalqaro pul o‘tkazma tizimlaridan (yillik o‘sish 19 foiz) amalga oshirilgan”, deyiladi Markaziy bank tahlilida.
Qolgan 4,9 milliard dollari fuqarolar bank kartalariga to‘g‘ridan-to‘g‘ri (o‘sish 52 foiz) hamda 650 million dollari bank o‘tkazmasi (SWIFT) orqali (o‘sish 2,4 barobar) kelib tushgan.
Izoh (0)