“Заправкалар очилса, газ нархи қимматлашиши мумкин” — Мамаризо Нурмуродов 2023 йилда кутилаётган инфляцион хатарларни айтди

Ўзбекистонда 2023 йилда инфляция ўсишига бир қатор омиллар таъсир қилиши мумкин. Бу ҳақда Марказий банк раиси Мамаризо Нурмуродов 26 январь куни ўтказилган матбуот анжуманида маълум қилди, дея хабар берди “Дарё” мухбири.

Мамаризо Нурмуродовнинг таъкидлашича, асосий инфляцион хатарлардан бири аҳоли ва тадбиркорлик субекатларининг инфляцион кутилмалари ошиб бораётгани билан боғлиқ.

“Иккинчидан, базавий инфляция даражасининг юқори кўрсаткичларда шаклланаётгани. Кейин бюджет тақчиллигининг 4 фоиз даражасида шаклланиши ҳам маълум жиҳатдан инфляцион хатарларни келтириб чиқаради.

Таклиф билан боғлиқ инфляцион хатарлар ҳам бор. Бунга тўхталадиган бўлсак, метан гази узиб қўйилди. Бу ўз-ўзидан бензин тақчиллигини юзага келтирди. Биз нима хатарни кутяпмиз, деганда, Марказий банк эртага газ заправкалари очиладиган бўлса, газ нархининг кўтарилиб кетиши мумкин”, — деди раис.

Мамаризо Нурмуродовнинг қўшимча қилишича, аномал совуқ келгуси йилда кутилаётган ҳосилдорликка салбий таъсир қилиши мумкин.

“Бу ҳолат нархларга оширувчи босим кўрсатади. Яна битта масала, бизнинг истеъмолимизда бўлган айрим товарлар устувор равишда импорт билан боғлиқ. Ўшаларни бизга етказувчи асосий савдо ҳамкорларимиз экспортига маълум чекловлар киритилиши ҳам инфляцияга таъсир қилади.

Кейинги хатар қурилиш материаллари нархларига бориб тақалади. Ҳозирги табиий газ узилишлари қурилиш материаллари таклифида танқислик келтириб чиқариб, келгусида бу маҳсулотлар нархлари ошишига олиб келиши мумкин. Пул ўтказмалари ҳажмининг ўсиши ҳам инфляцияга босим ўтказувчи хатар ҳисобланади”, — деди Марказий банк раҳбари.  

Мамаризо Нурмуродовга кўра, монетар хатарлар ҳам инфляцияга жиддий таъсир қилади. Шунинг учун Марказий банк кредит маблағлари ўсишини ялпи ижтимоий маҳсулотни номинал ўсишидан оширмаслик бўйича монетар инфструментлардан фойдаланмоқчи.