“O‘zaviatsiya” agentligi Flyadeal aviakompaniyasiga O‘zbekistonga muntazam aviaqatnovlarni amalga oshirish uchun ruxsatnoma berdi. Bu haqda agentlik matbuot xizmati xabar bermoqda.
Bu O‘zbekiston va Saudiya Arabistoni o‘rtasida havo qatnovi to‘g‘risidagi hukumatlararo bitimga asosan berildi. Parvozlar A320 samolyotida amalga oshiriladi.
Aviakompaniya Jidda—Toshkent—Jidda, Madina—Toshkent—Madina va Jidda—Namangan—Jidda yo‘nalishlarida muntazam qatnaydi.
Shavkat Mirziyoyevning 2022-yil avgustida Saudiya Arabistoniga davlat tashrifi davomida ikki mamlakat transport idoralari tomonidan fuqaro aviatsiya sohasida anglashuv memorandumi imzolangani hamkorlikning yangi bosqichini boshlab berdi. Mazkur tashrif davomida transport, xususan, havo transporti sohasida ikki mamlakat o‘rtasidagi mavjud aloqalarni yanada kengaytirish, shaharlar o‘rtasida muntazam aviareyslarni tashkillashtirish bo‘yicha muhim kelishuvlarga erishildi.
2023-yil dekabrida O‘zbekiston va Saudiya Arabistoni shaharlari o‘rtasida muntazam aviaqatnovlar soni haftasiga 70 taga yetkazishga kelishildi.
2024-yil mayida O‘zbekiston shaharlaridan Saudiya Arabistoni shaharlari o‘rtasida muntazam parvozlar soni har bir tomondan 50 tagacha ko‘paytirishga kelishib olindi va erishilgan kelishuvlarni tasdiqlash maqsadida memorandum imzolandi.
Izoh (0)