Молдованинг амалдаги президенти Майя Санду сайловнинг иккинчи босқичида ғалаба қозонганини эълон қилди ва “барча учун президент” бўлишга ваъда берди. Бу ҳақда “Коммерсант” хабар берди.
Молдовада 3 ноябрь куни президентлик сайловларининг иккинчи босқичи бўлиб ўтди. Давлат раҳбари курсисини эгаллаш учун амалдаги президент Майя Санду ва собиқ бош прокурор, мухолифатдаги социалистлар партиясидан номзод Александр Стояногло курашди.
Ўтган сайловларда фаол иштирок этганлари учун сайловчиларга миннатдорлик билдирмоқчиман. Бундан ташқари, ҳар бир фуқаронинг овози, улар мени ёки рақибим Александр Стояноглони афзал кўрганидан қатъи назар мамлакатимиз келажагига қўшилган ҳисса ҳисобланади, деди Санду.
У Стояноглонинг республикада барқарорлик, осойишталик ва тинчликни сақлашга даъватини қўллаб-қувватлади. Ҳамма учун президент бўлишга ваъда бераман, дея қўшимча қилди сиёсатчи.
Санду, шунингдек, сиёсий қарашларидан қатъи назар, мамлакатда барқарорлик ва фуқаролар ўртасида ишончни мустаҳкамлаш унинг устувор йўналиши бўлиб қолишини айтди.
Марказий сайлов комиссияси маълумотларига кўра, овозларнинг 99,1 фоизи ҳисоблаб чиқилганида Санду президентлик сайловининг иккинчи босқичида 55, 06 фоиз, Стояногло эса 44,94 фоиз овоз билан етакчилик қилмоқда.
Майя Санду Европа интеграцияси, Россияга қарши санкциялар ва оммавий ахборот воситалари устидан назоратни кучайтириш сиёсатини қўллаб-қувватлайди. Стояногло, ўз навбатида, Европа билан интеграцияни қўллаб-қувватласа-да, Москва билан прагматик муносабатларни сақлаб қолишни афзал кўради.
Изоҳ (0)