Ирландия пойтахти Дублиндаги минглаб аҳоли мавжуд бўлмаган Ҳеллоуин парадини кутиб, шаҳар кўчаларига тўпланди.
Бўлажак парад ҳақида My Spirit Halloween сайти эълон қилди, бу хабарга ишонган Дублин шаҳри аҳолиси Парнелл майдонидан Темпл Баргача бўлган йўналиш бўйлаб тўпланди. Ҳеч қандай параддан дарак бўлмагач, Ҳеллоуин мухлислари алданганликларини билиб, тарқалишган.
My Spirit Halloween — сунъий интеллектдан фойдаланиб, хабарлар тузадиган Покистон янгиликлар сайти. Сайт сохта парад ҳақида хабар яратганидан сўнг, маълумотлар қидирув тизимини оптималлаштириш (СЕО) орқали кўплаб янгиликлар ва ижтимоий медиа сайтларига тарқатилди.
Кўплаб одамлар мавжуд бўлмаган парадга махсус тайёрланиб, турли костюмларда келишганини ҳам таъкидлаш зарур. Ирландия полицияси оломонни тарқатиб юборишга мажбур бўлди.
“Илтимос, интернетда тарқалаётган маълумотларга ишониб кетаверманг. Дублин шаҳар марказида Ҳеллоуин паради режалаштирилмаган”, дейилади полициянинг ижтимоий тармоқдаги расмий саҳифасида.
Парадга келган оломон шунчалик кўп эдики, Дублин шаҳар маркази орқали ўтувчи Луас трамвай тармоғи икки линияда узилишларга дуч келди. Қизил ва Яшил йўналишлар ярим соат давомида хизмат кўрсата олмади.
Изоҳ (0)