Irlandiya poytaxti Dublindagi minglab aholi mavjud bo‘lmagan Hellouin paradini kutib, shahar ko‘chalariga to‘plandi.
Bo‘lajak parad haqida My Spirit Halloween sayti e’lon qildi, bu xabarga ishongan Dublin shahri aholisi Parnell maydonidan Templ Bargacha bo‘lgan yo‘nalish bo‘ylab to‘plandi. Hech qanday paraddan darak bo‘lmagach, Hellouin muxlislari aldanganliklarini bilib, tarqalishgan.
My Spirit Halloween — sun’iy intellektdan foydalanib, xabarlar tuzadigan Pokiston yangiliklar sayti. Sayt soxta parad haqida xabar yaratganidan so‘ng, ma’lumotlar qidiruv tizimini optimallashtirish (SEO) orqali ko‘plab yangiliklar va ijtimoiy media saytlariga tarqatildi.
Ko‘plab odamlar mavjud bo‘lmagan paradga maxsus tayyorlanib, turli kostyumlarda kelishganini ham ta’kidlash zarur. Irlandiya politsiyasi olomonni tarqatib yuborishga majbur bo‘ldi.
“Iltimos, internetda tarqalayotgan ma’lumotlarga ishonib ketavermang. Dublin shahar markazida Hellouin paradi rejalashtirilmagan”, deyiladi politsiyaning ijtimoiy tarmoqdagi rasmiy sahifasida.
Paradga kelgan olomon shunchalik ko‘p ediki, Dublin shahar markazi orqali o‘tuvchi Luas tramvay tarmog‘i ikki liniyada uzilishlarga duch keldi. Qizil va Yashil yo‘nalishlar yarim soat davomida xizmat ko‘rsata olmadi.
Izoh (0)