Оскар де ла Ҳоя: Бектемир Мелиқўзиев — ваҳший йиртқич

Профессионал бокснинг супер ўрта (-76,2 кг) вазн тоифасида рингга чиқаётган Бектемир Мелиқўзиев (3-0, 3 КО) АҚШнинг машҳур Golden Boy промоутерлик компанияси билан шартнома имзолади. Бу ҳақда компания ўзининг Twitter’даги саҳифасида маълум қилган.

Промоутерлик компанияси раҳбари, собиқ боксчи Оскар де ла Ҳоя Мелиқўзиев билан тузилган шартномадан сўнг ўз фикрлари билан ўртоқлашган.

«Биз «Мир бокса» (Wоrld of Boxing) билан Бектемир Мелиқўзиевнинг фаолиятини тарғиб қилишда ҳамкор бўлганимиздан хурсандмиз. Бу йигит — мутлақ ваҳший йиртқич. У кучли, чидамли, оёқ ва қўл ҳаракатлари ҳам жуда тезкор. Айниқса бу вазн тоифаси учун сезиларли даражада. Биз унинг рейтингда жуда тез кўтарилишини барчага кўрсатиб қўйишини сабрсизлик билан кутмоқдамиз», — дейди Де ла Ҳоя.

«Бектемир ҳали ёш, аммо шунга қарамай ўта тажрибали ва ҳаваскор боксда ўзининг иқтидорини намойиш этишга муваффақ бўлган. Ўзи ҳам профессионал бокснинг энг юқори чўққисига чиққан Оскар де ла Ҳоядек функционер билан ҳамкорлик натижасида Бектемирнинг ҳам юқори чўққиларни забт этишига ишончим комил», — деган «Мир бокса» раҳбари Андрей Рябинский.

«Бек — рингда ҳақиқий безори, аммо рингдан ташқарида жуда ёқимли ва қувноқ бола. Мен Golden Boy билан ҳамкорликда у аллақачон эришиб бўлган юлдузликнинг энг юқори чўққисига чиқишини сабрсизлик билан кутмоқдаман», — дейди Мелиқўзиевнинг менежери Вадим Корнилов.

Шунингдек, Бектемир Мелиқўзиевнинг ўзи ҳам янги шартномадан сўнг ўз фикрларини билдириб ўтган.

«Wоrld of Boxing ва Golden Boy билан ҳамкорликда узоқ ва муваффақиятли фаолият юритишимга кўзим етмоқда. Бундай профессионал жамоага эга эканим жуда ҳам ёқимли. Мен уларнинг кўпчилигини боксчи сифатида ўтказган жангларини ТВ орқали кўрардим ва қачондир АҚШда худди улардек жанглар ўтказишни орзу қилардим. Энди бу имконият менда бор ва ундан бор қобилиятимни ишга солиб фойдаланаман. Чалғиб қолманг, энди барча жангларим ўтказиб юбориш мумкин бўлмайдиган даражада ажойиб спектаклга айланади», — дея Мелиқўзиев сўзларини келтирмоқда GoSport.

Эслатиб ўтамиз, Бектемир Мелиқўзиев декабрь ойида ўзининг илк чемпионлик камари учун рингга чиқади. Унга франциялик собиқ жаҳон чемпиони Ҳассан Н’Дам Н’Жикам (37-4, 21 КО) рақиблик қилиши кутилмоқда.