Pesto laqabli qirol pingvin bolasi o‘zining g‘ayrioddiy ko‘rinishi bilan ijtimoiy tarmoq foydalanuvchilarini quvontirib kelmoqda. 9 oylik Pestoning vazni 22 kilogramm bo‘lib, bu ko‘rsatkich pingvin tug‘ilgan joy — Avstraliyaning Melburn shahridagi Sea Life akvariumi uchun yangi rekorddir.
Sea Life vakillarining qayd etishicha, ijtimoiy tarmoqlarda Pesto tasvirlangan videolarni butun dunyodan 2 milliardga yaqin odam tomosha qilgan. Paxmoq pingvin o‘zining jozibali ko‘rinishi bilan foydalanuvchilarni hayratda qoldirdi. Ko‘plab insonlar Pestoga iliq so‘zlar yozib qoldirmoqda va pingvin bilan yaqindan tanishish uchun Sea Life akvariumiga tashrif buyurmoqda.
Akvarium mutaxassislari Pestoning “ishtahasi karnay” ekanligini ham ta’kidlab o‘tdi: Pesto kuniga 25 ta baliq iste’mol qiladi. Ammo uning sog‘lig‘idan tashvishlanishning hojati yo‘q. Mutaxassislarning fikriga ko‘ra, Pestoning organizmi katta miqdorda oziq-ovqat talab qilishi bunday turdagi pingvin uchun normal holatdir va hatto qirol pingvinning shiddat bilan o‘sib borayotgan organizmi uchun foydalidir.
Pestoning bunday katta vazni uning genetikasi bilan bog‘liq bo‘lishi mumkin, ulg‘aygani sari u 15 kilogrammgacha vazn tashlashi mumkin. Taqqoslash uchun, pingvinning ota-onasi Hadson va Tangoning vazni 11 kilogrammdan.
Qirol pingvin 31-yanvarda tug‘ilgan va uning yaxshi o‘sib-rivojlanishiga hayvonot bog‘idagi qulay yashash sharoitlari, qat’iy e’tibor va parvarish sabab bo‘lgan. Pesto ulg‘aygani sari asta-sekin jigarrang patlarini to‘ka boshlaydi va boshqa pingvinlar kabi silliq tanaga ega bo‘ladi. Qushning butun dunyodan muxlislari tez orada uning oq va qora tusga kirgan suratlarini ko‘rishni kutib qolmoqda.
Izoh (0)