3,5 km yo‘l ta’mirlandi, hovuzlar qurildi, tez yordam mashinalari olib kelindi: Murodjon Azimov g‘uzorliklarga bergan va’dasini bajardi

Qashqadaryo viloyati hokimi Murodjon Azimov G‘uzor tumanining Taxam qishlog‘ida yashovchi aholiga bergan va’dasini bajardi. Qishloqda 3,5 km yo‘l ta’mirlandi, bir nechta suv hovuzlari qurildi, tez yordam mashinalari olib kelindi. Bu haqda “Daryo”ga viloyat hokimining matbuot kotibi Ahror Sodiqov xabar berdi. 

Bildirilishicha, viloyat hokimi 2024-yilning 20-iyul kuni G‘uzor tumanidan 90 kilometr uzoqlikda joylashgan Taxam qishlog‘iga borib, aholi bilan muloqot qilgan va murojaatlarini tinglagan. 

Viloyatimiz rahbarining tashabbuslari bilan qator tuman va qishloqlarda katta o‘zgarishlar qilinmoqda. Shunday hududlardan biri G‘uzor tumanidagi Taxam qishlog‘idir. U yerda amalga oshirilgan ishlar ham viloyat rahbarining xalq bilan muloqoti natijasidir, deydi Ahror Sodiqov. 

Aniqlashtirilishicha, hokim va aholi muloqotidan so‘ng qishloqqa transformatorlar o‘rnatilgan, 3,5 kilometr tuproq yo‘l shag‘al qilingan. 

Ichimlik suvi ta’minotini yaxshilash uchun 1 ta 30 tonnalik hovuz ta’mirlandi. 5 ta xonadonga yangi hovuzlar qurildi. Bundan tashqari, Taxam, Jonqora va Kengsoy qishloqlarida yangi mahalla binosi qurildi. Ushbu qishloqlarga 1 tadan tez tibbiy yordam mashinalari olib kelindi. Qishloqdagi 35-umumiy o‘rta ta’lim maktabining tashqi fasadi hamda bir nechta xonalari ta’mirlandi va zamonaviy jihozlar bilan ta’minlandi. “Ibrat farzandlari” o‘quv markazi tashkil qilinib, maktabning kutubxonasiga 1000 dona yangi kitoblar olib kelindi. Kam ta’minlangan oilalarning 100 nafar farzandlariga maktab formalari va o‘quv qurollari tarqatildi, deydi mas’ul.

Qo‘shimcha qilinishcha, qishloqdagi ehtiyojmand oilalardan 6 ta xonadonning tomi shifer bilan yopilgan, 15 nafar bolaning sunnat to‘yi o‘tkazilgan. 

Taxam qishlog‘ida ishsizlik muammosini hal qilish uchun 35-umumiy o‘rta ta’lim maktabidagi 2 ta bo‘sh turgan xona ta’mirlanib, ularda tikuvchilik sexi tashkil qilindi. Natijada 20 nafar xotin-qizlar bandligi ta’minlandi. Qishloqqa 3 ta maxsus konteyner olib kelinib, ularda sartaroshxona, savdo do‘koni va jun titish sexi tashkil etildi. Bu esa 6 nafar fuqarolarning ish bilan ta’minlanishiga sabab bo‘ldi.

Shuningdek, qishloq aholisiga jun yigiruv va gilam to‘qish uskunalari yetkazib berildi. Natijada yana 24 nafar fuqarolar ish bilan ta’minlandi. Chorvachilik yo‘nalishida ham sezilarli ishlar amalga oshirildi. “Qorako‘l” mahallasi fuqarolari uchun 980 million so‘m limit ajratildi va 28 nafar fuqaroga 461 million so‘m miqdorida kredit naqd pul ko‘rinishida berildi. Ushbu loyihalar orqali qishloqda jami 136 nafar fuqaro ish bilan ta’minlandi, deydi Ahror Sodiqov.