Президент Шавкат Мирзиёев 5 сентябрь куни Хитой Коммунистик партияси Марказий қўмитаси Сиёсий бюроси аъзоси, Тяньцзинь шаҳри партия қўмитаси котиби Чэнь Минэрь бошчилигидаги Хитой Халқ Республикаси делегациясини қабул қилди. Бу ҳақда Президент матбуот хизмати хабар берди.
![](/static/2024/09/05/2024-09-05 20.24.42-vy_dCzp1.jpg)
Учрашув бошида Чэнь Минэрь давлат раҳбарига Хитой Халқ Республикаси Раиси Си Цзиньпиннинг саломи ва энг эзгу тилакларини етказди.
Олий даражадаги келишувларга мувофиқ Ўзбекистон билан Хитой ўртасидаги кўп қиррали ҳамкорлик ва амалий шерикликни, айниқса, фаол ҳудудлараро мулоқот доирасида янада чуқурлаштириш масалалари муҳокама қилинди.
Кейинги йилларда Ўзбекистон—Хитой дўстлик ва ҳар қандай шароитда ҳам стратегик шериклик муносабатларида юксак даражага эришилгани катта мамнуният билан қайд этилди.
![](/static/2024/09/05/2024-09-05 20.24.46-Awyo0atm.jpg)
Тяньцзинь шаҳрининг етакчи компаниялари билан савдо, саноат, “яшил” энергетика, қурилиш ва инфратузилмани модернизация қилиш, қишлоқ хўжалиги, тўқимачилик, фармацевтика ва бошқа соҳаларда кооперация лойиҳаларини илгари суришга алоҳида эътибор қаратилди.
Инновациялар, таълим ва маданият соҳаларида алмашинув дастурларини кенгайтириш муҳимлиги таъкидланди.
Ўзбекистон ҳудудлари ва Тяньцзинь шаҳри ўртасидаги ўзаро манфаатли ҳамкорлик бўйича “йўл харитаси”ни қабул қилишга келишиб олинди.
Изоҳ (0)