Навоий шаҳридаги озиқ-овқат дўконида алкоголь ва тамаки маҳсулотлари савдога қўйилгани аниқланди, деб хабар бермоқда прокуратура департаменти.
Маълум қилинишича, ҳолат Бош прокуратура ҳузуридаги департаментнинг Навоий вилоят бошқармаси томонидан ўтказилган тезкор тадбирда аниқланган. Навоий шаҳрида фаолият юритувчи “А.Т.” МЧЖ масъул шахслари алкоголь маҳсулотлари билан чакана савдо қилиш учун рухсатнома олмасдан, МЧЖга қарашли озиқ-овқат дўконида тегишли ҳужжатлари бўлмаган умумий баҳоси 51,2 млн сўмлик — 649 дона алкоголь ҳамда 1 249 қути тамаки маҳсулотларини қонунга хилоф равишда ўтказиш мақсадида сақлаб келаётгани аниқланиб, ушбу маҳсулотлар ашёвий далил сифатида олинган.
Мазкур ҳолат юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Андижон вилояти Избоскан туманидаги ёғ ишлаб чиқариш цехидан 1,6 миллиард сўмлик истеъмолга яроқсиз алкоголь маҳсулотлари топилгани ҳақида хабар берилганди.
Изоҳ (0)